Athenae

Vide etiam paginam discretivam: Athenae (discretiva)

Athenae

Academia Athenarum
Res politicae
Natio	Graecia
Condita	antiquitus
Demarchus	Georgius Camines
Res geographicae
Area  - tota	38 km²
Numerus incolarum  - omnium (2001)  - Spissitudo  - Tractus metropolitanus	745 514 19 619 incolae/km² 3 738 734 (2005)
Coordinata	38° 00′ ″ Sept., 23° 43′ ″ Ort.
Altitudo	70 m
Situs interretialis: www.cityofathens.gr

Athenae (-arum, pl., f.) (Graece: Ἀθῆναι; Neograece: Αθήνα), maxima Graeciae urbs, incolas fere 750 000 anno 2005 numeravit (sed in regione metropolitana 3 750 000). In media regione Attica iacet, iuxta orientalem paeninsulae continentali Graecae oram, a portu Piraeo 12 km distans. Mons Acropolis abrupta, ubi a millennio tertio a.C.n. homines continuatim habitavisse censentur, hodie usque monumentis antiquitatis praeclarissimis ornata, in media urbe stat. Hodie Athenae caput est nomarchiae Athenarum, peripheriae et nomi Atticae, omnisque civitatis Graeciae. Anno 1896, primi ludi Olympici temporis recentioris Athenis facti sunt.

Vicus Πανεπιστήμιου (sc. universitatis); ad partem laevam Academia et principalis universitatis aula videntur

Athenae nonnumquam "cunabula democratiae" appellantur, interdum "fons culturae Occidentalis." Athenienses saeculo sexto a.C.n. exeunte democratiam sensu strictiori instituerunt; licuit enim civibus omnibus adultis masculinis in comitiis vocem proferre; servis autem, mulieribus, aliarumque civitatum nativis^? voci omnino carentibus. Saeculo quinto a.C.n., urbs omnium civitatum Graecarum potentissima fuit; imperium (sed vero nomine Concilium Delium) omnes fere insulas Aegaearum complectentem direxit; praeclara a tragoedis Aeschylo, Sophocle, Euripide, comoedia Aristophane et Menandro, philosophis Socrate, Platone et Aristotele, historicis Thucydide et Xenophonte reddita est. A quo tempore usque ad "antiquitatem posteriorem" (saeculum fere quintum p.C.n.) Athenas sophistae, philosophi, grammatici inlustraverunt, iuvenesque Imperii Romani sicut ad universitatem congregaverunt; Romani etiam, inter quos praecipue Herodes Atticus, urbem excoluerunt. Ob hanc rationem urbes recentiores nonnullae, quae in aliis civitatibus eruditionem iuvenibus praebent, cognomen Athenarum nactae sunt. Postea fuit urbs provincialis imperii Byzantini, caput ducatus ab anno 1204, urbs (sed potius oppidum) imperio Ottomanico ab anno 1458. Libertate ab Ottomanidis nacta, civitas Graecia caput statuit Athenis anno 1833; ibi annis insequentibus constructae sunt universitas, palatium regium, academia, parlamentum. Anno 1896 ludi Olympici temporis hodierni Athenis primum celebrati sunt.

A portu Piraeo naves in permultas regiones et insulas Graeciae crebriter vehunt. A novo aëroporto Athenarum, ad honorem Eleutherii Benizeli nuncupato, aëroplana ad totam fere orbem terrarum properant. Graecia ferrivias perpaucas, vias stratas hodie plures habet. Ferrivia Metropolitana Attica, partim subterranea, hic anno 2000 coepta est; haec ferrivia partim ad celebrantes ludorum Olympicorum 2004 recipiendas aucta est, una cum novis viis stratis quae urbem penetrant et suburbiis circumferuntur. Inter urbes divitissimas Athenae hodie sexagesima et septima enumeratur, inter sumptuosissimas vigesima et quinta. Regio metropolitana inter densissime habitatas orbis terrarum octogesima et secunda ordinatur.

Planities Atticae, in qua urbs ipsa iacet, a montibus Aegaleo (ad occidentem), Parnide (ad boream), Pentelico, et Hymetto (ad orientem) cincta. Aeroportus novus iuxta marginem dextram videtur, insulae Salamis ad laevam partem et Aegina ad pedem imaginis

Nomen urbis, origine incognita, appellationi Athenae deae religionis Graecae antiquae aliquo modo adnectitur; Athenienses antiqui hanc deam patronam urbis recognoverunt.

Geographia

Urbs in media planitie seu valle Attica iacet, a montibus Aegaleo, Pentelico et Hymetto cincta; partem borealem huius vallis a monte Parnide clauditur. Montes tres, multo minores sed abrupti et saxosi, in ipsa urbe surgunt, scilicet Areopagus, Lycabettus, Acropolis; huius ad pedem partes antiquissimae Athenarum reperiuntur, Placa, Anaphiotica et Monasteracium.

Conlocatio peripheriae Atticae et antea nomarchiae Athenarum in Graecia

Forma pristinae nomarchiae Athenarum (colore cyaneo picta) in Attica

Demi et communia pristinae nomarchiae Athenarum. 1: Urbs Athenae

Partitiones demi Athenarum

Saeculis undevicensimo exeunte et vicensimo ineunte exstructi, vici magni urbem veterem circumeunt. Vicus Πανεπιστήμιου (sc. universitatis), a foro Σύνταγμα incipiens, aedificia Academiae, Universitatis et Bibliothecae Nationalis praetervehit et ad forum Unitatis seu Ομονοία fert. A quo ad meridiem versus vicus Αθήνας regio Mercati Novi penetrat plateamque Μοναστηράκι attingit iuxta ruinas fori antiqui (Ἀγορά). A foro Ομονοία boream versus, vicus Τρίτης Σεπτέμβριου ad oppidum suburbanum Acharnas fert. A foro Σύνταγμα ad orientem tendens, vicus Βασιλίσσης Σοφίας palatium regium, Museum Mpenaceum regionesque urbanas Colonacium et Ampelocepi (sc. "vinearum") praetercurrit; cuius continuatio vicus Κηφισίας ad oppidum suburbanum opulentem Cephisiam tendit. Vici Πειραίως, a foro Ομονοία incipiens, et Συγγρού a foro Σύνταγμα incipiens, ambo ventum eurum versus ferunt, ubi, iuxta Saronici sini oram, reperitur portus Piraeus. Meridiem versus, a media urbe fere 12 km distans, iacet Phalerum Vetus, alter Athenarum antiquarum portus.

Via nova, nomine "Αττική Όδος" distincta, regioni urbana circumfertur. Via nationalis 8A, e partibus occidentalibus Athenarum incipiens, per Eleusinem, Megara, Corinthum, Sicyonem ad Patras tendit; via nationalis 1, a vico Κηφισίας originem habens, ad Thebas, Lamiam, Larissam et Thessalonicam fert.

Administratio

Si plus cognoscere vis, vide Attica (regio Graeciae) et Athenae (demus)

Athenae anno 1834 caput Graeciae factae sunt Naupliae succedens, quae ab anno 1829 caput ad tempus fuerat. Praeterea Athenarum demus est caput regionis Atticae. Athenae sive Athenarum demum sive omnes in Atticae planitie diffusas urbis Athenarum vicos significare potest.

Attica regio

Athenae in regione Attica sitae sunt, quae est condensissima incolis regio Graeciae fere 4 000 000 milia hominum comprehendens. Attica regio in octo unitates regionales divisa est, quarum quattuor sequentes urbem Athenarum „ampliorem“ formant::

• Athenae Septentrionales
• Athenae Occidentales
• Athenae Mediae
• Athenae Meridianae

Usque ad annum 2010 hae quattuor unitates regionales nomarchiam Atthenarum effecerunt, quae erat praefecturarum Graeciae densissime habitata (2 805 262 incolas in area 361 km2 complectens)

Demus Athenarum

Demus Athenarum demorum Graeciae densissime habitatus est 655 780 incolas (anno 2011) complectens in area |39 km2.

Administratio demi Athenarum a demarcho seu magistro urbis dirigitur. Hoc officium primus implevit anno 1836 Anargyrus Petraces. Annis 2006-2010 Nicetas Caclamanes, vir rerum politicarum peritus factionis Novae Democratiae, demarchus Athenarum fuit, a die 29 Decembris 2010 Georgius Camines (Γεώργιος Καμίνης), qui canditatus liber (i.e. nulli factioni adhaerens) in electione praevaluit, hoc munere fungitur.

Demus urbis Athenarum in septem partitiones seu δημοτικά διαμερίσματα divisus est, quarum formam in tabula vides:

1. Mediae Athenae, regio commercialis, Ομόνοια, Πλάκα, Στάδιο
2. Regiones meridionales a Novo Mundo ("Νέος Κόσμος") auspicantes
3. Regiones ad eurum spectantes (Αστεροσκοπείο, Πετράλωνα et Θησείο)
4. Regiones occidentales (Κολωνός, Ακαδημία Πλάτωνος et Σεπόλια)
5. Regiones boreales superiores
6. Regiones boreales inferiores (Πατήσια et Κυψέλη)
7. Regiones orientales (Αμπελόκηποι, Ερυθρός Σταυρός, Πολύγωνο aliaeque).

Septem partitiones administrationis causa formatae sunt, Athenienses autem urbem in vicos translaticios, quos γειτονιές ("vicinias") vocant, dividunt, quorum quisque historia ac proprietatibus differt. Athenae ampliores e demo Athenarum et 34 aliis demis consistit, qui in supradictas quattuor unitates regionales distributi sunt.

Athenae ampliores unal cum Regionali Piraei Unitate aream Athenarum urbanisticam efficiunt, ad hoc largior area metropolitana a quosdam remotiores vicos urbesque Athenas circumdantes comprehendit.

Origo urbis

Si plus cognoscere vis, vide Historia Athenarum

Est fabula nota in qua Athena Poseidonque, et patrones esse et nomen urbi dare volentes huncque honorem petentes, dona obtulerunt. Poseidon, cuius donum imperium navalem significavit, tridente terram pulsans fontem fecit. Athena autem, cuius donum pacem prosperitatem significavit, olivam creavit. Cecrope rege Atheni donum Athenae accepientes urbem Athenas appellaverunt. Urbs Athenae neque Athena appellata est quod olim decem erat urbes quas Theseus coniunxerunt.

Monumenta

Acropolis Athenarum

• Acropolis
  • Erechtheum
  • Parthenon
• Agora
• Stadia Olympica:
  • Stadium Olympicum Atheniense
  • Stadium Panathenaicum

Vide etiam

• Index incolarum notorum Athenarum
• Urbes quae nomen Athenarum nactae sunt
• Museum Archaeologicum Nationale (Athenae)

Nexus externi

• Situs interretialis urbis Athenarum (Neograece, Anglice)
• Situs peregrinis destinatus (Anglice)
• "Athen" in Enzyklopädie des europäischen Ostens (Theodisce)
• De Athenis apud TV5 (Francogallice)
• Fontes de origine Athenarum (Anglice)
• Athenis 2004 De ludis Olympicis 2004 (Anglice)

Bibliographia

• Chtouris, Sotiris, Elisabeth Heidenreich, et Detlev Ipsen. 1993. Von der Wildnis zum urbanen Raum. Zur Logik der peripheren Verstädterung am Beispiel Athen. Fracofurti ad Moenum.
• Papageorgiou-Venetas, A. 1994. Hauptstadt Athen. Ein Stadtgedanke des Klassizismus. Monaci.