Papa
Papa (-ae, masc.) est episcopus Romanus, summus pontifex Ecclesiae Catholicae. Secundum doctrinam Catholicae Ecclesiae, papa est successor Sancti Petri et munus universae ecclesiae Christianae regendae gerit.
Origo ministerii Petrini in Christi verbis Simoni coram apostolis dictis fundatur:
- Tu es Petrus, et super hanc petram aedificabo ecclesiam meam, et portae inferi non praevalebunt adversum eam et tibi dabo claves regni caelorum et quodcumque ligaveris super terram erit ligatum in caelis et quodcumque solveris super terram erit solutum in caelis. (Matt. 16,18–19)
Naturam huius ministerii ecclesia semper intellexit constantem temporis decursu esse, aliquo semper id exercente in ecclesia. Cum Petrus Romam pervenerit et ibi munere episcopali functus sit ibique mortuus, episcopi Romani semper solverunt officium hoc. Inde a veterrimis temporibus, ministerium paparum fuit non tantum erga Romam, sed erga universalem ecclesiam. Itaque papa Clemens I (tertius post Petrum) scripsit ad ecclesiam Corinthiorum ut pater, eos adiuvans et monens ut res ecclesiae suae recte disponerent. Natura huius muneris per historiam ecclesiae semper aptatur ad necessitates temporis, sed quoad essentiam semper eadem esse habetur.
In Codice Iuris Canonici sic definiuntur munus atque auctoritas Summi Pontificis:
- "Can. 330—Sicut, statuente Domino, sanctus Petrus et ceteri Apostoli unum Collegium constituunt, pari ratione Romanus Pontifex, successor Petri, et Episcopi, successores Apostolorum, inter se coniunguntur.
- "Can. 331—Ecclesiae Romanae Episcopus, in quo permanet munus a Domino singulariter Petro, primo Apostolorum, concessum et successoribus eius transmittendum, Collegii Episcoporum est caput, Vicarius Christi atque Universae Ecclesiae his in terris Pastor; qui ideo vi muneris sui suprema, plena, immediata et universali in Ecclesia gaudet ordinaria potestate, quam semper libere exercere valet.
- "Can. 333—§1. Romanus Pontifex, vi sui muneris, non modo in universam Ecclesiam potestate gaudet, sed et super omnes Ecclesias particulares earumque coetus ordinariae potestatis obtinet principatum, quo quidem insimul roboratur atque vindicatur potestas ordinaria, propria et immediata, qua in Ecclesias particulares suae curae commissis Episcopi pollent.
- §2. Romanus Pontifex, in munere supremi Ecclesiae Pastoris explendo, communione cum ceteris Episcopis immo et universa Ecclesia semper est coniunctus: ipsi ius tamen est, iuxta Ecclesiae necessitates, determinare modum, sive personalem sive collegialem, huius muneris exercendi.
- §3. Contra sententiam vel decretum Romani Pontificis non datur appellatio neque recursus."
Nunc papa a cardinalibus in conclavi eligitur. Electio felix fumo albo fidelibus significatur. Papa in Civitate Vaticana habitat, etsi ecclesia cathedralis dioecesis Urbis est Basilica Lateranensis. Nunc Papa Franciscus est.
Index |
Tituli et insignia[recensere]
Papae tituli sunt:
- Episcopus Romanus
- Vicarius Iesu Christi
- Successor principis apostolorum
- Caput Universalis Ecclesiae
- Summus Pontifex Ecclesiae Universalis[1] vel Pontifex Maximus
- Patriarcha Occidentis (unus ex quinque patriarchis antiquis: Romae, Constantinopolis, Alexandriae, Antiochiae, Hierosolymorum; hunc titulum Benedictus XVI in Annuario Pontificio anni 2006 omitti constituit)
- Primas Italiae
- Archiepiscopus et metropolitanus provinciae ecclesiasticae Romanae
- Princeps sui iuris Civitatis Vaticanae
- Servus Servorum Dei
Papae insignia sunt:
- Anulus piscatoris
- Camaurus
- Fanon
- Flabella
- Insignia episcopalia
- Mantum papale
- Pallium
- Sedes gestatoria
- Subcinctorium
- Tiara sive triregnum (a Paulo VI abrogata)
Caerimonia coronationis papae (a Romano pontifice Ioanne Paulo I reformata) ritum includebat verbis "Sic transit gloria mundi" notum.
Benedictio urbi et orbi est sollemnis papae benedictio, episcopi Sanctae Romanae Ecclesiae ("urbi") et pastoris universalis ("orbi") propria, quae impertitur in sollemnitatibus maximis, id est Natalis Iesu Christi et Paschae.
Vide etiam[recensere]
Notae[recensere]
Nexus externi[recensere]
 |
Vicimedia Communia plura habent quae ad papas spectant. |
