Regio Moscuensis

Regio Moscuensis^[1] vel Mosquensis^[2] (Russice Московская область, tr. Moskovskaja oblast) est subiectum Foederationis Russicae, in illius Districtum Foederalem Centralem inclusum. Instituta administrationis regionis huius, anno 1929 creatae, sunt Moscuae, quae tamen est subiectum Foederationis sui iuris, atque (ab anno 2007) in urbe Rubrimontio^[3] prope illam.

Situs

Praeter Moscuam (in medio) regio Moscuensis cum regionibus Tueriensi (in septentrio-occidente et septentrione), Iaroslaviensi (in septentrione), Volodimiriensi (in septentrio-oriente et oriente), Resaniensi (in meridie-oriente), Tulensi (in meridie), Calugensi (in meridie-occidente) et Smolenscensi (in occidente) contermina est, in parte media planitiei Europaeae Orientalis sita. Aream 45 799 km² et circa 7312 milia incolarum (anno 2016) habet.

Hydrographia

Moscus flumen per regionem fluit; Occa ad meridiem et Volga ad septentrionem terras regionis tangunt. Flumina regionis minora Klazma, Istra, Dubna, Sestra, Iachroma, Iausa sunt. Canalis Moscuae partem regionis borealem transsecat, aquam Volgae in Moscum ferens.

Urbes regionis

Multae urbes regionis veteres sunt, quae Medio Aevo ipsae capita ducatuum fuerunt; tales sunt Zvenigorodia, Ruza et Mosaiscum, in fluxu Mosci superiore sitae, Columna, in ostio eius aedificata, ubi in Occam influit, et Serpuchovia ad Occam sita in ostio Narae fluminis. Tales sunt et Demetriopolis in parte regionis boreali, Cuneum in fluxu Sestrae superiore et Volokia in extremitate regionis boreooccidentali. Sergiopolis in parte regionis boreali circum monasterium Russiae principale crevit, lauram sancti Sergii; haud longe ab ea et Rhadonezia urbs Sergii natalis sita est.

Kochira et Stupino in ripis Occae diversis sitae sunt; Dubna est urbs regionis unica ad Volgam sita, Theotocopolis ad Klazmam, Iachroma ad Iachromam. Orbium, Telonium et Podolsk tam prope ad Moscuam sunt, ut nunc suburbia eius haberi possunt.