Publius Rutilius Rufus

E Vicipaedia
Salire ad: navigationem, quaerere

Publius Rutilius Rufus (natus circa annum 158 a.C.n., mortuus 78 a.C.n. Smyrnae) vir publicus Romanus fuit.

Cursus honorum[recensere | fontem recensere]

Rutilius annis 134 - 132 a.C.n. tribunus militum apud Scipionem Aemilianum fuit. Circa annum 118 praeturam adeptus est atque 115 primo - tum frustra - consulatum petebat. Tum Marcus Aemilius Scaurus electus est[1]. Anno 113 a.C.n. legatus in Cretam insulam missus est. Annis 109 - 107 legatus Quinti Caecilii Metelli Numidici Bello Iugurthino interfuit[2]. Anno 105 a.C.n. una cum Gnaeo Mallio Maximo consul electus est et post cladem die 6 Octobris apud Arausionem a Cimbris et Teutonibus acceptam milites Romanos arte gladiatorum instruebat[3]. Anno 94 legatus proconsulis Asiae Quinti Mucii Scaevolae fuit. Anno 92 a.C.n. a publicanis provinciae accusatus est et a iudicio equitum iniquo, urgente Mario[4], repetundarum ad exilium damnatus est[5]. Primo Mytilenem, deinde Smyrnam in exilium iit, qua in urbe Cicero eum anno 78 convenit[6]. Tum Romam reverti recusavit[7].

Philosophus et iuris peritus[recensere | fontem recensere]

Discipulus Panaetii fuit[8] atque doctrinam Stoicismi tenebat ac inter personas Ciceronis librorum "De re publica" inductus est. Res gestas Romanas composuit, hodie deperditas, in quibus multa de vita sua rettulisse dicitur. Praeterea, ut qui iuris peritus habebatur, responsa dare solebat[9].

Bibliographia[recensere | fontem recensere]

Notae[recensere | fontem recensere]

  1. Marcus Tullius Cicero, de oratore II 280
  2. Gaius Sallustius Crispus, Bellum Iugurthinum 50,1; 52-53
  3. Valerius Maximus II 3,2
  4. Cassius Dio, fragmenta XCIII
  5. Titus Livius, periochae LXX; Velleius Paterculus, Historia Romana II 13,2
  6. Marcus Tullius Cicero, Brutus 85
  7. Lucius Annaeus Seneca, Epistulae morales XXIV 4
  8. Marcus Tullius Cicero, Brutus 114; de officiis III 10
  9. Marcus Tullius Cicero, Brutus 114


Antecessores:
Quintus Servilius Caepio et Gaius Atilius Serranus
Consul
105 a.C.n.
cum
Gnaeo Mallio Maximo
Successores:
Gaius Flavius Fimbria et Gaius Marius II