Willelmus Tyrensis

Willelmus Tyrensis (natus circa 1130 in Palaestina; mortuus 1185) fuit archiepiscopus Tyrensis et historicus rerum Palaestinae et Antiochiae. Nomen eius editores scribunt nunc Willelmus (ut Huygens, vide infra), nunc Guillelmus (ut J. P. Migne).

Post primam expeditionem sacram parentibus burgensibus Francogallicis aut Italicis natus est, et frater Radulphus fuit mercator in regno Hierosolimitano. Puer Hierosolimae educatus, adulescens ad Europam transfretavit ut artes liberales, theologiam, auctores antiquos, et mathematicam in universitatibus Parisiensi Bononiensique studeret.

Hierosolimam anno 1165 regressus, canonicus basilicae Acconensis et iam archidiaconus ecclesiae Tyrensis factus est, et anno 1167 rex Amalricus eum legatum misit ad imperatorem Constantinopolitanum Manuel I, ut pactum cum imperatore contra Aegyptum foederaret. Anno 1170, tutelam nanctus est Amalrici filii Balduini, quem Willelmus ipse leprosum invenit. Balduino patri succedente anno 1174, Willelmus cancellarius regni ab Raimundo III Tripolitano, vicario Balduini, delegatus est, et anno postero archidiaconus pallium archiepiscopatus Tyrensis assumpsit. Anno 1179 legatus ecclesiae Hierosolimitanae in Tertio Concilio Laterano interfuit.

Cum Willelmus anno 1180 patriarchatum Hierosolimitanum petiverit, affinitas Raimundo, iam invidiam reginae patienti, petitionem perdidit. Heraclius archiepiscopus Caesareae, reginae dilectus et, ut fama fuit, adulter, munus impetravit. Willelmus anno 1185 mortuus est.

Opera

Willelmus dicit se scripsisse duo opera quae nunc deperdita sunt, Acta Concilii Laterani et Historia sive Gesta orientalium principum (Historia Orientis a Machometo 1184 usque). Opus solum eius hodie servatum celeberrimum est Historia rerum in partibus transmarinis gestarum, patrone Amalrico ab anno 1170 usque ad mortem suum scriptum et postea in lingua Francogallica antiqua extensum.

Bibliographia

• Willelmi Tyrensis Archiepiscopi Chronicon ed. R. B. C. Huygens. Turnhout, 1986. [Historia Latine]
• R. B. C. Huygens, "Guillaume de Tyr étudiant", Latomus 21 (1962): 811-829.
• Bernard Hamilton, The Leper King and his Heirs. Cambridge University Press, 2000.
• Peter W. Edbury, John G. Rowe, William of Tyre: Historian of the Latin East. Cambridge University Press, 1988.

Antecessor: Fridericus

Archiepiscopus Tyrensis 1175–1185

Successor: Joscius