Insulae Liachovenses
Insulae Liachovenses[1] sunt pars archipelagi Sibiriae Novae australis, quae freto Demetrii Laptevii a terra continente et freto Sannikovii ab insula Cortinae ceterisque insulis Anjou separata est. In Oceano Glaciali Septentrionali (Arctico) inter maria Lapteviorum et Sibiricum Orientale iacent, nunc pars rei publicae Iacutiae Foederationis Russicae sunt.
Insulae Liachovensis maior et Liachovensis minor archipelagi insulae principales sunt, ad occidentem ab iis Stolbovoj insula minor sita est; prope ad Stolbovoj duae insulae abolitae sitae erant, Basilii (Vasil'jevskij) et Symeonis (Semënovskij), prima annis sexagesimis saeculi XX et secunda annis tricesimis a mari destructae (nam his locis, ubi terra congelatione aeterna tota constricta est, talis abolitio bene nota est). Prope ad has insulas perditas anno 2013 insula nova arenosa Iaia inventa est.
Ab Iacobo Permiakov et Mercurio Vagin anno 1712 inventae sunt, sed nomine Ioannis Liachov appelatae, qui circa annum 1773 his locis mammuthorum ossa quaerebat.
Notae[recensere | fontem recensere]
- ↑ Norae Zabinkovae et Moysis Kirpicznikov Nomina physico-geographica principalia URSS s.v. Ляховские о-ва.
Nexus externi[recensere | fontem recensere]
|
Situs geographici et historici: Locus: 74°39′36″N 141°59′14″E, 73°42′46″N 138°32′55″E • GeoNames • Большая российская энциклопедия |