Herodium

E Vicipaedia
Jump to navigation Jump to search
Herodii vestigia e caelo conspicua.

Herodium est arx et domus regia ab Herode Magno inter 25 et 15 a.C.n. aedificata in tumulo manu hominis facto circiter 15 km a Hierosolymis distante. Quod aedificium mausoleum quoque illius regis fuit,[1] etsi non omnes archaeologi de sarcophago eius hodie consentiunt. Duae domus regiae erant : altera summo in colle bene munita, altera spatiosior atque ob aquarum copiam amoenior, sub colle posita. Modica urbs circumiacebat.

Hunc locum adhuc nudum elegit Herodes ut magnam victoriam anno 40 a.C.n., eo ipso tempore quo Parthi provinciam Romanam invaderant, ibidem de Iudaeis Hasmonaeorum dynastiae faventibus relatam commemoraret[2]. Anno 70 captis Hierosolymis, Herodium una e tribus arcibus fuit (aliae erant Masada et Machaerus) quae Romanis portas aperire recusarunt : anno 72 tandem a legato Lucilio Basso capta[3] et diruta est. Tertio bello Iudaico Herodium a legato Simonis Barchochebae occupatum unum e capitibus rebellionis denuo fuit.

Ipsae excavationes Israelitorum archaeologorum quae nuper mausoleum Herodis detexerunt dissensiones moverunt quia Herodium hodie in territorio ab Israelitis quidem occupato sed a Palaestinis futurae civitati destinato positum est.

Fontes[recensere | fontem recensere]

Media arx regia.

Si vis plura legere[recensere | fontem recensere]

  • Herod the Great : the King's final journey, cur. Silvia Rozenberg and David Mevorah, Jerusalem, The Israel Museum, 2013
  • Herodion, Jerusalem : Franciscan Printing Press, 1972-1989, tria volumina :
    • 1. Gli edifici della reggia - fortezza, cur. Virgilio C. Corbo , 1989
    • 3. Catalogo delle monete, cur. Augusto Spijkerman, 1972
    • 4. I graffiti e gli ostraka, cur. Emmanuele Testa, 1972
  • Ernestus Maria Laperrousaz, Trois hauts lieux de Judée : les palais-forteresses hérodiens de Massada et de l'Hérodium, le couvent essénien de Qoumrân et ses "Manuscrits de la mer Morte", Parisiis, 2001
  • Roi Porat et alii, Herodium : Final reports of the 1972-2010 excavations directed by Ehud Netzer. Vol. 1, Herod's tomb precinct, Jerusalem : Israel Exploration Society, 2015
  • Jean-Michel Roddaz et Jean-Claude Golvin, Hérode : le roi architecte, Arelate, Actes Sud, 2014

Notae[recensere | fontem recensere]

  1. BI I.673. Ant. Iud. XVII.199.
  2. BI I.265.
  3. BI VII.163.

Nexus externi[recensere | fontem recensere]