Drevlani
Drevlani[1] fuerunt gens Slavica mediaevalis, quae Polessiam meridianam saeculis decimo et undecimo incoluit, Dregoviciorum vicina. Eorum caput fuit Iscorosten[2] (nunc Korosten' regionis Zitomiriensis). Knezos proprios habuerunt, quorum Malus notus est. Ab Helgo Fatidico victi vectigal Kioviae dederant, sed Helgo mortuo seditionem fecerunt et Inguarum ducem perdiderunt; a Helga uxore Inguari crudeliter oppressi imperio Kioviae oboediebant. Helgus Sventoslai filius Helgae nepos dux Drevlanorum erat. Annis 1136 et 1158 ultimo in annalibus memorantur.
Notae
[recensere | fontem recensere]- ↑ Constantini Łucsakowski Historiae praeteritorum annorum versio, cap. 3. Nomen gens arborum significat, de Slavico drevo, arbor.
- ↑ Ibidem, cap. 28.
Nexus externi
[recensere | fontem recensere]- De Drevlanis in Encyclopaedia Russica magna (Russice)
- De Drevlanis in Lexico encyclopaedico Brockhaus et Efron (Russice)
 |