Actinum
Actinum est proteina cytosceleti in omnibus corporis cellulis maxime abundans. Nam in eukaryotarum cellulis actini filamentorum reticulum membranam cytoplasticam ita sustinet ut formam totius cellulae finiat et reptatum loco se moventis per pseudopodes permittat. Item extrema mitosi anulus actini filamentorum membranam contrahit ut cellula mater in duas cellulas filias scindatur. Item magnas partes agit in endocytosi et exocytosi atque vesiculis formandis. Quin etiam in myocytis tali ordine struuntur illa filamenta ut a myosino ATP hydrolysante trahantur atque totius musculi contractum efficiant.
De structura moleculari[recensere | fontem recensere]
Monomerum actini 375 aminoacida numerat (structura primaria) quae se in globi formam replicant (in familiam proteinarum globosarum ordinatur) ubi fissum invenias quo ATP ligatur. Haec structura tertiana Actinum G (globosum) appellari solet ut ab Actino F (filamentum) et structura quaternaria distinguatur. Nam monomera sese in polymerum e duabus catenis compositum inter se cohaerentibus et formam helicis sese dextrorsus moventis praebentibus sponte agglutinant. Quotienscumque monomerum catenae additur ATP hydrolyzatur in ADP in fisso mansurum et Pi qui removetur. Utrimque crescunt filamenta, citius tamen ex una parte quae polus + dicitur ut a polo - distinguatur. Revera filamenta tam minuuntur quam crescunt ac semper renovantur. Ramos quoque efficere possunt. Ita cellulae progredi possunt dum filamenta posterioris partis solvunt et monomeris ita liberatis utuntur ad filamenta anteriora longiora reddenda. Nihilominus proteinae quaedam capita filamentorum ita tegere possunt ut additamenta et ablationes sistant. Quorum diametrus circiter 60/70 Ångström tenuissimum est inter cytosceleti elementa.
De evolutione[recensere | fontem recensere]
Proteinae actino similiores et apud prokaryotas inventae sunt[1]. In eukaryotarum evolutione genum actini magna ex parte integrum servatum estː ita actinum Saccharomyces cerevisiae denis tantum aminoacidorum per centena ab humano actino differt. Quod indicium est quanti momenti in organismo sint actini munera et quam letales pleraeque mutationes.
De physiologia[recensere | fontem recensere]
Actinum plerumque cum aliis proteinis consociaturː cum in omnibus aliis cellulis tum praesertim in myocytis ad contractus motum perficiendum cum myosino collaborat, proteina motoria et ATP hydrolisante. Troponinum quoque et tropomyosinum ligationes inter actinum et myosinum moderantur dum ligationis situm in actino aut patefaciunt aut rursus tegunt.
Item in microvillis actinum cum fimbrino, calmodulino, villino... consociatur.
Notae[recensere | fontem recensere]
- ↑ K. K. Busiek, W. Margolin: "Bacterial actin and tubulin homologs in cell growth and division", Current Biology, 2015ː R243–R254
Fontes[recensere | fontem recensere]
- Elaine N. Marieb et Katja Koehn, Anatomie et physiologie humaines (undecima editio), Pearson, 2019 pp.101-105 et 323-331
- Charlotte Pratt et Kathleen Cornely, Essential Biochemistry, Wiley, 2018ː V.3. In versione Francogallica, De Boeck, 2019 pp.130-132
- Sherwood, Klandorf, Yancey, Animal physiologyː from Genes to Organisms, 2013ː 2.12 et 8.2-3. Interpretatio Francogallicaː De Boeck, 2016 pp.62-63 et 338-344.
Plura legere si cupis[recensere | fontem recensere]
- Emil Reisler, Edward H Egelman, "Actin structure and function: what we still do not understand", Journal of Biological Chemistry, 2007: 36133-7