Nucatum

E Vicipaedia
Mola nucati albi biologici.

Nucatum[1] (e 'nuce' vel potius sermone Latino vulgari 'nuca' cum suffixo -to, forma fictitia e linguis Romanicis restituta, e.g. occitanice nogat e noga) est bellariorum genus, quod ex saccharo melleve, nuce (amygdala, iuglande, pistacio, avellana puta) assata, et nonnumquam fructu conciso saccharoque condito fit. Nucati spissitudo ex compositione pendet, et a lento usque ad durum variat. Nucatum album ex albumine bene agitato factum molle est, nucatum fuscum, contra, ex saccharo tosto factum, firmius.

Nucatum in Europa Meridiana magni aestimatur, exempli gratia Monte Ademari in Francia, et tempore Festi Nativitatis in Hispania.

Nucatum quod in tabellis dulcibus hodiernis invenitur, vix simile est nucato translaticio, cum sit mixtura saccharosi et siropae maiziae, aerata cum albumine seu proteino hydrolyzato soyae. Nonnumquam insunt et adeps vegetabilis, pulvis lactis, et nux.

Nucatum Montiademarense constat ex 30% vel pluribus amygdalae, et ex 25% vel pluribus mellis lavandulati.

Notae[recensere | fontem recensere]

Bibliographia[recensere | fontem recensere]

  • Jane Levi, "Nougat" in Darra Goldstein, ed., The Oxford Companion to Sugar and Sweets (Oxonii: Oxford University Press, 2015) pp. 486-487

Nexus interni