Martinus Iulius Bram

Martinus Iulius Bram

Res apud Vicidata repertae:

Nativitas: 25 Septembris 1897;
Obitus: 9 Februarii 1956;

Martinus Iulius Bram (1897–1956) fuit praelatus Americanus Ecclesiae Episcopalis Civitatum Foederatarum, qui munus Episcopi Suffragani Floridae Meridianae^(en) ab anno 1951 ad annum 1956 sustinebat.

De iuventute et eruditione

Martinus Iulius (Anglice Martin Julius) Bram Novi Eboraci in urbe die 25 Septembris 1897 natus est, Martini Samuelis Bram et Helenae Chambers Bram filius. In publicis scholis urbanis eruditus, Collegium Hobartense^(en) frequentavit, ubi gradum Baccalauratus Artium magna cum laude anno 1926 accepit. Statim in Seminario Theologico Virginiae^(en) matriculavit, ubi gradum Baccalaureatus Divinitatis anno 1929 accepit.

Ministerium ordinatum

Bram diaconus mense Iunio 1928 ac presbyter mense Novembri 1929 a Philippo Cook^(en), Episcopo Delavariae, ordinatus est. Mox rector^(en) Ecclesiae Episcopalis Sancti Pauli^(en) Georgiopoli in Delavaria, tum anno 1933 rector Ecclesiae Sanctae Crucis Sanfordiae^(en) in Florida creatus est, ubi Mabel Harris Bowler in matrimonium die 17 Iunii 1935 duxit. Rector Ecclesiae Episcopalis Sancti Andreae^(en) Tampae omnino et subtiliter per secundum bellum mundanum, a die 7 Decembris 1941 (die Portus Margaritarum) ad diem 2 Septembris 1945 (diem victoriae Iaponiensis^(en)) fuit, cum se munere loci abdicaret. Confestim usque ad annum 1951, rector Ecclesiae Episcopalis Sanctae Trinitatis^(en) Litore Palmensi Occidentali in urbe in Comitatu Litoris Palmensis et regione Orae Aureae^(en) fuit.

Anno 1950, secretarius Concilii Ecclesiarum Floridae creatus est, organizationis religiosae rassismo resistentis atque iura agricolarum, emendationem systematis iustitiae scelestae^(en), et pacem inter gentes adiuvantis, anno 1947 conditae.

Episcopatus

Bram, in conventu dioecesiano Litore Daytonensi^(en) habito Episcopus Suffraganus Floridae Meridianae suffragio secundo die 10 Aprilis 1951 electus, in sua paroecia in Litore Palmensi Occidentali die 21 Septembris 1951 a Henrico I. Louttit^(en), Episcopo Floridae Meridianae et olim rectore eiusdem paroechiae, consecratus est, episcopis Mason Dallasii et Burton Nassoviae comitantibus.

Universitas Meridiei^(en) gradum Doctoris Divinitatis honoris causa, Seminarium quoque Theologicum Virginiense^(en) mense Iunio 1952 ei concessit.

Iura civilia et salus publica eum episcopum magnopere tenebant. Iuvenis quidem inter Indos Monacanos^(en) in Comitatu Amherstensi in Virginia missionarius laboraverat.

Subito, cum refugio spirituali^(en) in Monasterio Boni Pastoris prope Urbem Malorum Sinensium^(en) in Florida interesset, infarctu cordis die 9 Februarii 1956 vita decessit. Reverendus Gulielmus F. Moses ei in episcopatum successit.

Bibliographia

• Bram, Martin J. 1921. "Bear Mountain or Indian Mission: Unique Work near Amherst." Southwestern Episcopalian, 5 et 14. Textus in Virginia Indian Archive,^{[nexus deficit]} die 9 Aprilis 2023 accessus.