Phineus

Phineus et Boreades (Calais et Zetes) ad mensam victu onustam Harpyarum adventum exspectant. Crater Atticus rubeis figuris. Museum Lupariense.

Duo Phinei fuerunt in mythologia Graeca :

Phineus, vates.

Primus Phineus erat filius Agenoris, regis Phoeniciae. Postquam sororem Europam Iupiter rapuit, iussus a patre ut ceteri fratres (Cadmus, Cilix, Phoenix...) eam quaesitum profectus est. Quam cum reperire non posset, novam urbem (Salmydessam nomine) in litore Thraciae condidit, ubi rex Odrysarum fuit.

Duos filios e Cleopatra uxore, filia Boreae, genuit : Plexippum ac Pandionem, quos postea excaecavit cum secunda uxor, Idaea, eos de vi accusavit. Haec a nonnullis auctoribus causa fuisse dicitur, cur Phineus postea et ipse a Borea irato excaecatus sit. Sed eum vaticinandi facultate Apollo donaverat : cum autem deorum arcana consilia studiosius mortalibus traderet, inter ipsa dicta a Iove irato excaecatus plerumque traditur. Alii contendunt eum longam vitam oculis suis praetulisse. Iupiter in eum Harpyas quoque immisit quae omnem cibum potumque ex ore eriperent atque taetro odore polluerent. Diu miserrimus sic egit; donec Argonautae ad litus Thraciae appulerunt. Tum fatis ipsis iubentibus alati filii Boreae, Zetes et Calais, per aerem paventes Harpyas persecuti sunt atque Phineum aerumnis poenaque liberaverunt. Qui laetatus miris in modis Iasonem et comites eius viam ad Colchos gratus docuit ac futuros eventus praedixit.

Fontes.

Calais et Zetes Harpyas fugant.

• Apollodori bibliotheca I,9,21.
• Apollonius Rhodius, libro secundo Argonauticon
• Diodorus Siculus libro quarto Bibliothecae Historicae, cap. 43-44.
• Hyginus, Fabulae 19-20.
• Ovidius libro septimo Metamorphoseon versus 1-4.
• Valerius Flaccus, libro quarto Argonauticon 425-636.

Phineus, sponsus Andromedae.

Alter Phineus, Beli filius atque regis Aethiopum Cephei frater, erat patruus Andromedae. Idem et sponsus erat. Sed postquam Perseus eam monstro marino, Ceto, eripuit, Andromedam sibi vindicavit in matrimonium annuente patre. Tunc Phineus iratus filium Iovis cum armata manu adgressus est : circumventus ab hostibus Perseus Gorgoneum caput e sinu prompsit atque ita Phineum comitesque in saxa vertit.

Fontes.

• Ovidius libro quinto Metamorphoseon versus 1-235.