Myrtilus

E Vicipaedia
Jump to navigation Jump to search
Hippodamia, Pelops, Oenomaus, Myrtilus circa aram pactum facientes (vas in Apulia pictum). Adsunt etiam Aphrodite et Eros.

In mythologia Graeca Myrtilus erat auriga Oenomai, Pisanorum regis. Domino in quadrigarum certaminibus opem ferebat qui instituerat ut quicumque filiam suam Hippodamiam in matrimonium petebat aut primum patrem velocitate equorum vinceret aut moreretur. Quia autem equos Aquilone velociores possidebat omnes proci vincebantur et interficiebantur donec Pelops Tantali filius, sive dimidium regni sive, ut volunt alii, noctem unam cum Hippodamia pollicitus, Myrtilum corrupit, qui currus rota in cursu ut solveretur effecit. Mortuo tamen Oenomao Pelops Hippodamiam quidem uxorem duxit sed promissa dare recusavit atque Myrtilum in mare praecipitavit, unde secundum nonnullos mythographos nomen Myrtoi maris ductum est[1].

Notae[recensere | fontem recensere]

  1. Hanc etymologiam Pausanias (VIII.14.12) falsitatis arguebat, Boeotorum argumenta referens ː e cuiusdam feminae enim nomine hoc mare appellatum demonstrabat.

Fontes[recensere | fontem recensere]