Zodiac (pellicula 2007)

Zodiac est pellicula Americana aenigmatica et formidulosa anno 2007 a Davide Fincher moderatore disposita ex scripto scaenario ab Iacobo Vanderbilt facto, quod in libris documentariis Zodiac (1986) et Zodiac Unmasked (2002) Roberti Graysmith positum est.

Pellicula in rebus veris posita est, nam annis 1960 et 1970 in regione sinuosa Franciscopolis versabatur homicida serialis qui se Zodiaci nomine appellabat. Inter facinora crudelissima Zodiacus cryptogrammata ad ephemeridem loci mittebat. In pellicula inquisitores quattuor, Zodiacus quisnam sit, agnoscere conantur.

Argumentum[recensere | fontem recensere]

Die 4 Iulii anno 1969 in regione amoris (lovers' lane) Vallejo urbis Solano Comitatus vir ignotus quam crudelissime Darlenam Ferrin et Michaelem Mageau iuvenes in autocineto secum consuetudinem facientes sclopetat. Soli Michaeli superesse contingit. Deinde mense post San Francisco Chronicle litteras cryptogrammatibus scriptas accipit ab interfectore qui "Zodiacum" se appellat: minatur enim, nisi litteras cryptogrammatibus factas divulgent, insuper duodecim homines se interfecturum.

In sede biocolytica Franciscopolitana David Toschi et Gulielmus Armstrong homicidia a Zodiaco facta investigant. In ephemeride autem Paulus Avery diurnalista celeberrimus, cum Roberto Graysmith gryllographo quattuor et viginti annorum Zodiaci homicidiis incitato, suam inquisitionem adgreditur. Primum tamen Paulus Avery officiositatem Roberti Graysmith respuit, sed mox cooperationi adsentitur.

Septembri mense ad Berryessa lacum Napa Comitatus Brianus Hartnell et Cecelia Shepherd iuvenes ab homicida cultro violantur. Cecelia biduo post vitam amittit. Inde post septimanam tertiam Paulus Stine taxiraedarius Franciscopolitanus sclopetando occiditur. Zodiacus panniculum camisiae cruentae Pauli Stine ad San Francisco Chronicle mittit cum litteris cavillabundis.

Aliquot interpositis mensibus Arthur Leigh Allen, vir vilis et sceleratus, ab investigatoribus biocolyticis interrogatur suspectus in causa Vallejo. Vident enim eum horologium armillare "Zodiac" gestare, eodem logotypo ornatum, quo Zodiacus homicida utitur, et Toschi eum homicidam istum esse credit. Sed quidam chirographo peritus litteras Zodiaci ab Arthuro Allen scriptas esse negat. Deinde Paulus Avery minacibus acceptis litteris in paranoeam adductus ad medicamenta et alcohol confugit. Ut ex hac causa evadere possit, sedem laboris mutare constituit.

Graysmith Zodiaci causa male inlaqueatus navitate sua magis magisque homines vexat, et paulatim Melania uxor omissa clementiam suam amittit et cum liberis alio se confert. Graysmith de homicidiis Zodiaci perseveranter adit Davidem Toschi, quem tandem adducit, ut aliquatenus secum cognitiones causae communicet. Graysmith etiam in colloquio televisifico de libro narrat, cui de causa Zodiaci scribendo operam dat, et mox telephonemata ab aliquo viro moleste spiranti recipere incipit. Sedem laboris amittit.

Pertenui argumento indicioque Allen in culpa esse videtur, sed indicia physica, sicut impressiones digitales et chirographa eum non implicant. Postea in urbe Vallejo contingit Roberto Graysmith occurrere Arthuro Allen in taberna ferraria, ubi venditor operatur. Paulisper alter alterum intuentur. Allen "Quid vis?" inquit, Graysmith "Nihil a te" locutus abit.

Multis annis post Michael Mageau, vir caedi in Vallejo factae superstes alcoholique deditus, Arthurum Allen iam antea mortuum ex imagine photographica biocolytorum agnoscit. At fortasse eundem vultum iam saepius viderit? Causa insoluta remanet.

Distributio partium selectarum[recensere | fontem recensere]

Partes maiores

Iacobus "Jake" Gyllenhaal — Robertus Graysmith
Marcus Ruffalo — David Toschi
Robertus Downey iunior — Paulus Avery
Antonius Edwards — Guilelmus Armstrong

Partes minores

Chloë Sevigny — Melania Graysmith
Ioannes Carroll Lynch — Arthurus Leigh Allen
Brian Cox — Melvin Belli
Carolus Fleischer — Robertus "Bob" Vaughn
Zach Grenier — Mel Nicolai
Philippus Baker Hall — Sherwood Morrill
Elias Koteas — Iacobus "Jack" Mulanax
Iacobus LeGros — Georgius Bawart
Donal Logue — Kenethus Narlow
Dermot Mulroney — Martius Lee
Adam Goldberg — Duffy Jennings

De exitu pelliculae[recensere | fontem recensere]

David Fincher moderator pelliculae, Iacobus Vanderbilt scriptor scaenarius et Bradley J. Fischer effector cinematographicus caedes Zodiaci investigando duodeviginti menses egerunt. Quamvis pellicula tam bene explorata quam proxime ad veritatem accedere temptet, nonnullae tamen res spectatores vexaverunt, nam sunt qui certum et definitum exitum pelliculae dare maluerint, etsi, quis re vera fuerit Zodiacus interfector, nondum liquet.

Bibliographia[recensere | fontem recensere]

Binotto, Johannes (2007) Die Angst vor der Leerstelle. David Finchers ZODIAC und das Genre des Serienkillerfilms. Filmbulletin 5: 8-10.
Lim, Dennis (2007) David Fincher’s masterful ‘Zodiac’. Los Angeles Times, die 22 Iulii.
Riskala, Tuomas (2007) Zodiac. Mestariluokan mysteeri. Episodi, die 25 Maii.
Stevens, Dana (2007) No Guts, No Gory. David Fincher’s Zodiac is surprisingly cerebral. Slate, die 2 Martii.