Porlock

Porlock est oppidum Somersetensis comitatus in Anglia occidentali situm ad oram manicae Bristoliensis. Ibi nundinae et mercatus tenebantur ab anno 1366;^[1] in mercatibus medio saeculo XIX celebratis (ter annuatim, diebus Iovis ante 13 Septembris, 11 Octobris et 12 Novembris) venditabantur boves et oves, hae praesertim varietatis parvioris Porlocks nuncupatae.^[2]

Ad Porlock nostro tempore homines fere 1 450 habitant, sed peregrinatores aestivi, ruris saltuumque Exmoor litorumque rupestrium admiratores, oppidum frequentant. Horum inter celebriores fuerunt poëtae Lacuum (ita nuncupati) Gulielmus Wordsworth, Samuel Taylor Coleridge, Robertus Southey: hic carmen titulo Porlock conscripsit; Coleridge etenim, prope morans, in scholio anno 1816 divulgato a person ... from Porlock ("hominem a Porlock advenam") inculpavit quia incursione fastidiosa intempestivaque carmen Kubla Khan non iam perscriptum e mente vatis expunxisset.^[3]

Oppidum bis in Chronicis Anglosaxonum refertur. Anno fere 917 "piratae" Vicingi, ducibus Ohtor et Hroald, e Britannia Minore manicam Bristoliensem invaserunt; ab Herefordiensibus et Glocestriensibus repulsi ad Porlock et iuxta Watchet noctu furtim descenderunt, unde ab incolis debellati in insula vel Flat Holm vel Steep Holm refugium reppererunt: ibi alimentis carentibus multi obierunt.^[4] Haroldus Godwini filius, rex futurus, anno 1052 cum septem navibus ex Hibernia portum Porlock aggreditur et vastavit.^[5]

Notae

↑ Samantha Letters, "Gazetteer of Markets and Fairs in England and Wales to 1516^{[nexus deficit]}"
↑ Lewis s.v. "Porlock"
↑ Vide Samuel Taylor Coleridge, Christabel &c. (3a ed. Londinii: William Bulmer, 1816) p. 53
↑ Chronica Anglosaxonum Ā anno 918 (insula Bradan Relice), D anno 915 (insula Steapan Reolice) et similiter B et C
↑ æt Port locan: Chronica Anglosaxonum E anno 1052 (in recensionibus aliis nomen Porlock non reperitur)

Bibliographia

"Porlock" in John Collinson, The History and Antiquities of the County of Somerset (3 voll. Bathoniae, 1791) vol. 2 pp. 34-37
"Porlock (St. Dubritius)" in Samuel Lewis, ed., A Topographical Dictionary of England (7a ed. 1848. ~)
"Porlock" in Nikolaus Pevsner, The Buildings of England: South and West Somerset (Harmondsworth: Penguin, 1958) pp. 275-276

Nexus externi

Situs geographici et historici: Locus: 51°12′32″N 3°35′44″W • OpenStreetMap • 7291689 GeoNames • Vision of Britain • Open Domesday

Vicimedia Communia plura habent quae ad Porlock spectant.

[1] Samantha Letters, "Gazetteer of Markets and Fairs in England and Wales to 1516^{[nexus deficit]}"

[2] Lewis s.v. "Porlock"

[3] Vide Samuel Taylor Coleridge, Christabel &c. (3a ed. Londinii: William Bulmer, 1816) p. 53

[4] Chronica Anglosaxonum Ā anno 918 (insula Bradan Relice), D anno 915 (insula Steapan Reolice) et similiter B et C

[5] æt Port locan: Chronica Anglosaxonum E anno 1052 (in recensionibus aliis nomen Porlock non reperitur)

[1]

[2]

[3]

[4]

[5]