Amalrici villare

Amalrici villare^[1] (hodie Ammerschwihr) est commune Francicum 1'594 incolarum (anno 2022) praefecturae Rheni Superioris et ab anno 2021 Communitatis Europaeae Alsatiae in regione orientali olim Alsatia, post autem diem 1 Ianuarii 2016 Alsatia Campania Arduenna et Lotharingia et nunc ex plebiscito Grand Est appellata.

Historica

Amalrici villa primum anno 869 memoratur (tum praedium rusticum erat). Urbis statum accepit postquam tres vici quarto decimo saeculo in unum coaluerunt. Itaque tres domini iura ibi inter se dividebant: Imperium Germanicum, domini de Ribeaupierre et domini de Hohlandsberg qui omnes unam e tribus portis custodiebant. Cives iam vini commercio dediti erant. Die 3 Maii 1491 sancta Virgo in loco remoto huius parochiae Trois Epis (Tres Spicae) nominato apparuisse dicitur; cuius rei memoria peregrinos hodieque in capellam accersit. Prosperitatem urbis sexto decimo saeculo ostendunt multa aedificia ad illam aetatem referenda. Imminuitur tamen aliquantulum Bello Triginta annorum cum incolae in fidem Francogallorum sese recipiunt.

Urbs tamen maxima ex parte deleta est mense decembri anno 1944 et ianuario 1945 cum Americani Germanos ex Alsatia expulerunt qui circa Colmariam diutissime et impigerrime restiterunt. Captivi ad reedificationem aliquid contulerunt^[2]