Tippi Hedren
Tippi Hedren
Patria: Civitates Foederatae Americae
Familia
Proles: Melanie Griffith
Tippi Hedren sive sollemniter Nathalie Kay Hedren (anno 1930 nata) est scaenica et animalium tutrix Americana, quae duabus innotuit partibus in pelliculis ab Alfredo Hitchcock factis: The Birds (1963) et Marnie (1964).
De vita[recensere | fontem recensere]
Nathalie Kay Hedren Novae Ulmae in oppido Minnesotano 19 Ianuarii anno 1930 nata est ex Dorothea Henrietta matre et Bernardo Carolo Hedren patre, mercatore emporii.[1] "Tippi" a patre blande appellabatur, quo usa est praenomine scaenico et cotidiano. Adulescens palam in emporiis loci vestes exhibere coepit. Finitis gymnasii studiis suum provectura curriculum Novum Eboracum demigravit. Bis in prima pagina Life ephemeridis se ostendit.
Anno 1952 Hedren Petro Griffith mangonii moderatori nupsit, et anno 1957 Melaniam filiam peperit. Sed divortio facto Tippi parens solitaria filiae quattuor annorum, ipsaque femina triginta annorum, ineuntibus annis 1960 Angelopoli versabatur et praeconiis edicendis quaestum faciebat. Alfredus Hitchcock autem, moderator pellicularum Anglicus, cum illam quondam aquam mineralem praeconialiter laudantem vidisset, pactum cinematographicum septem annorum fecit cum illa femina, quae scaenicam artem leviter modo degustaverat.
Hitchcock novam scaenicam suo more suam fecit, nam eam a ceteris histrionibus separabat, vestitum moresque dictabat, atque etiam nomen blandum actricis suae singulis virgulis 'Tippi' circumclusum scribi voluit.[2] Hedren primas partes ("Melanie Daniels") in fabula cinematographica The Birds (1963) egit, et praemio Golden Globe optimae actrici anni 1963 dedicato ornata est. Postero anno primas partes egit in Marnie, fabula cinematographica, de qua opiniones spectatorum ancipites fuerunt. Munera ad has pelliculas petinentia Tippi magnas sibi (et sane etiam Alfredo Hitchcock) aerumnas conflavisse narrat. Nam cum in 'Avibus' (The Birds) ageret, possidendi cupiditatem moderatoris experiri debebat, ac necopinatos tolerare actus, qui praeter promissa fiebant. In Marnie facienda Tippi urgendi temptationes amorisque confessiones moderatoris perferre debuit.[3] Quae ratio difficilis narratur in pellicula televisifica The Girl (2012), nam ita Tippi ab Hitchcock appellari solebat.
Ita finita est opera cum Alberto Hitchcock consociata, et Tippi, per duennium opere destituta. Sed anno 1967 partes minores ("Martha") egit in A Countess from Hong Kong, ultima pellicula a Carolo Chaplin facta. Annis 1970 partes minores egit in levioribus pelliculis. Anno 1981 delata est pellicula Roar ('Rugitus'), cui praeparandae Tippi et illius temporis maritus Noel Marshall sex septemve annos consumpserunt.
Notae[recensere | fontem recensere]
Bibliographia[recensere | fontem recensere]
- Golden, Lori (1999) Tippi Hedren: From "The Birds" to "Shambala", where It’s Lions and Tigers and More, Oh, My!, Pet Press mense Septembri.
- Hedren, Tippi (2016) Tippi. A Memoir. William Morrow.
- Kreitling, Holger (2016) Es war sexuell, es war pervers und es war hässlich. Welt 1 Novembris.
- Moral, Tony Lee (2013) The Making of Hitchcock's The Birds. Scarecrow Press.
- Moral, Tony Lee (2017) Hitchcock and the Making of Marnie. Scarecrow Press.
- Pappademas, Alex (2015) ‘We’d All Been Bitten, and We Kept Coming Back’: ‘Roar’ Star John Marshall on Making the Most Dangerous Movie of All Time. Hollywood Prospectus 17 Aprilis.
- Spoto, Donald (1999) The Dark Side Of Genius: The Life Of Alfred Hitchcock. Da Capo Press.
- Whitty, Stephen (2016) The Alfred Hitchcock Encyclopedia. Rowman & Littlefield.