Aloisius Aragonius

Aloisius (natus Neapoli die 6 Octobris 1474; Romae die 21 Ianuarii 1518 mortuus), cardinalis Aragonius, fuit filius Henrici de Aragonia et Polyxenae Ventimiglia. De hac re nepos fuit regis Neapolitani Ferdinandi I fraterque Ioannae de Aragonia ducissae Amalphitanae. Marchio fuit Hieracii, fratris successor, ab anno 1492 usque ad 1494, quo anno, matrimonio et marchionatu resignatis, vitam ecclesiasticam suscepit. Cardinalis eodem anno in pectore a papa Alexandro VI creatus est; protonotarius apostolicus meruit.

Soror, ab anno fere 1498 vidua, clam Antonio Beccadelli de Bononia nupsit, cui duos vel tres filios peperit. Hoc matrimonio iratus, frater Ludovicus in carcerem mitti iussit Ioannam filiosque, ubi ut videtur mox mortui sunt omnes; maritum Antonium, qui refugium apud Mediolanenses petiverat, anno 1513 interfici iussit. Historiam (partim in mythistoriam conversam) sic recapitulavit Matthaeus Bandello in Novellis suis:

Questi giorni una figliuola d'Enrico di Ragona e sorella del cardinal Aragonese, morto il marito che era duca di Malfi, prese per marito il signor Antonio Bologna, nobile, vertuoso ed onestamente ricco, che era stato col re Federico di Ragona per maggiordomo. E perché parve che digradasse, le gridarono la crociata a dosso, e mai non cessarono fin che insieme col marito ed alcuni figliuoli l'ebbero crudelissimamente uccisa, cosa nel vero degna di grandissima pietà. Onde, non essendo ancora l'anno che il signor Antonio fu miseramente qui in Milano ammazzato.

E versione huius historiae Francogallica Lope de Vega, scriptor scaenicus Hispanus, ludum El mayordomo de la duquesa de Amalfi anno circiter 1604 composuit; e versione Anglica Ioannes Webster, tragoedus Anglicus, The Duchess of Malfi anno fere 1613 docuit. "Cardinalis", frater sine praenomine ducissae Amalphitanae, in ludo Websteriano sicut in fabula Bandelli mortem iussit sororis cum marito et filiis huius.

Sepulcro hoc epitaphium inscribitur:

Aloisio Car, Aragonio Regg Neapolitan, Ferdinandi nepoti Alfonsiq. prioris pronepoti, qui vix annos xliiii, m iiii, d xv. Franciottus Car, Ursinus ex test f c a mdxxxiii

Ergo cun[c]ta licent Lachesis tibi nec datur ulli

Evitare tuas improba posse manus.

Regibus ille atavis Aloisius aeditus, ille

Cui roseus sacro vertice fulsit apex,

Ille, uni virtus omnis cui contigit, unus

Qui contra haec potuit vivere saecla iacet,

Heu quot nos mortale genus sperabimus annos

Si vita est ipsis tantula numinibus.

Bibliographia

• Simona Giurato,La Sicilia di Ferdinando il Cattolico. Tradizioni politiche e conflitto fra Quattrocento e Cinquecento (1468-1523). Soveria Mannelli: Rubettino, 2003.
• Domenico Morellini, Giovanna d'Aragona duchessa d'Amalfi: spigolature storiche e letterarie: a proposito d'una novella di Matteo Bandello. Caesenae: Vignuzzi, 1906 Textus apud archive.org

Nexus externi

• "Aragona, Luigi d'" e The Cardinals of the Holy Roman Church (situs a Salvatore Miranda elaboratus apud Bibliothecas FIU) (Anglice)
• "Trastamara (Aragonesi)" e Libro d'oro della nobiltà mediterranea (Italiane): sequere A1 > B11 > C1 > D4