Latinitas bona

Maya Angelou

E Vicipaedia
Salire ad: navigationem, quaerere
Angelou poëma "On the Pulse of Morning" recitat in inauguratione Gulielmi Clinton mense Ianuario 1993.

Maya Angelou (nata Marguerite Annie Johnson die 4 Aprilis 1928, mortua die 28 Maii 2014) fuit Civitatum Foederatarum Americae scriptrix et poëtria. Septem autobiographias, tres libros commentationum, aliquotque libros poësis edidit, et varias fabulas theatro, cinemateo, et telehorase scripsit. Per curriculum amplioris quinquaginta annorum multa praemia et gradus honorarios accepit. Celebris est libris de adulescentia sua, praecipue prima autobiographia, I Know Why the Caged Bird Sings (1969), quae vitam ad septimum decimum annum narrat.

Scriptrix facta est post seriem occupationum in adulescentia: fuit coqua, meretrix, saltatrix in discotheca, actrix in opera Porgy and Bess, ordinatrix Colloquii meridiani ductus Christiani, scriptrix actorum in Aegypto et Gana tempore decolonizationis. Fuit actrix, scriptrix, rectrix, ac productrix fabularum, pellicularum, spectaculorumque televisificorum. Ab anno 1982 in Universitate Wake Forest in oppido Winston-Salem in civitate Carolina Septentrionali habitavit, ubi fuit primus professor Reynolds rerum Americanorum. In motu pro iure civili versata est, cum Martino Luther King et Malcomo X collaborans.

Propter scripta et actiones Angelou facta est Afroamericanorum et mulierum oratrix honorabilis. Sunt qui opera eius in aliquis bibliothecis Americanis prohibere conati sunt, sed opera pervulgata in bibliothecis, scholis, universitatibusque manent. Angelou etiam recognita est innovatione litterarum: in autobiographiis suis, ordinarias generis structuram rhetoricamque mutare conata est. Quantum ad themata, magnum pondus in rassismum, identitatem, familiam, peregrinationem ponit.

Opera selecta[recensere | fontem recensere]

Autobiographiae[recensere | fontem recensere]