Joker (pellicula 2019)

Joker (2019)
Dispositor	Todd Philips
Scriptor	Todd Philips et Scott Silver
Primi actores	Ioachimus Phoenix Robertus De Niro Zazie Beetz Francisca Conroy
Compositor	Hildur Guðnadóttir
Duratio	122 min.
Lingua	Anglica

Joker est pellicula Americana a Todd Philllips anno 2019 disposita, qua non solum de adversario notissimo Vespertilionis sive Batmanni narratur sed etiam anima hominis male perturbati accurate inlustratur. In hac pellicula, Joker sive Ioculator antiheros factus amore captus animam suam convertit.

Arthurus Fleck, homo cruciatus destitutusque et mala mentis valetudine vexatus in Joker factus caede aliisque facinoribus inretitus est. Pellicula initium capit ab amentium captivorum valetudinario, ubi iudicium Athurum manet. Mentisne compos est an non? Num ipse an Ioculator homicidia quinque commiserit an non? In altera ala valetudinarii Arthurus Ioculator forte in amicitiam venit Leiae aegrotae. Leia se eius admiratricem esse dicit. Mutuo amare occipiunt, et mox adversus Systema moliuntur.

Argumentum

Est annus 1981, et Arthurus Fleck Gothamopoli cum Pennia matre in aedicula sordida habitat. Arthurus morbo neurologico laborat, qui eum, praesertim cum anxietate adficitur, involuntarie cachinnare facit. Postquam Arthurus quondam ab iuventute nefaria in sede operis oppugnatus est, Randall collega ei revolverium dat, quo se defendere possit. Ioculator conducticius est, sed de munere comoedi scaenici somniat, et in loco Murray Franklin moderatoris televisionis esse velit. At condicio Arthuri paulatim peior fit, nam ioculatoris operam amittit, cum inter spectacula in infantium valetudinario habita revolverium suum casu in pavimentum demittit. Idcirco adiutor socialis eius, per quam medicinam quoque obtinet, pecunias urbanas interrumpere cogitur.

Arthurus Sophiam Dumond, vicinam matrem solitariam, amore persequitur eamque ad spectaculum invitat. Sophia actionem comicum Arthuri spectat, quae propter morbum eius in cassum cadit. Dum per ferriviam subterraneam domum iter facit, etiam tum fucum iocatoris gerens, ebrii negotiatores societatis Wayne Investments tres eum inrident et adgrediuntur. Duos eorum se defendens sclopetat, tertium autem fugere conantem occcidit. Dominus eorum Thomas Wayne, milliardarius ac burgimagistri candidatus, caedes damnat, quas a scurra divitibus invido factas esse dicit. In viis autem motus reclamatorius fautorum Arthuri personatorum exoritur.

Arthurus epistulam a Pennia ad Thomam missam intercipit, legitque se spurcum esse filium Thomae. Ad matrem suam increpat, quod veritatem de origine sua celaverit. Arthurus ad Wayne Manor se confert, ubi in Brutum, filium iuvenem Thomae, incidit. Post rixam cum Alfredo Pennyworth atriensi familiae habitam fugit. Sed Penny, postquam interrogata est a duobus detectivis, qui de Arthuri participatu subterranearum caedium cognoscebant, apoplexi] icta comate oppressa in valetudinarium recipitur.

Interim Arthurus operam suam ioculatoriam provehere conatur, sed conatus in cassum cadit. Quam actionem infelicem taenia impressam Murray Franklin, moderator popularis programmatum nocturnorum atque idolum Arthuri, obtinet ac in programmate suo exhibet. Eum inridenter "scurram incompetentem" vocat, quod Arthurum magno dolore afficit.

Arthurus in festum beneficentiae inrepit et in latrina hospitali se opponit Thomae, qui se patrem eius esse negat, immo adfirmat ne Penniam quidem matrem biologicam Arthuri esse. Arthurus, cum inconsulte cachinnum tollit, a Thoma vapulatur. Deinde valetudinarium psychiatricum civitatis visitat et acta clinica Penniae legit, ex quibus eam narcissistam deliram fuisse apparet. In moroconium coactam esse, cum Arthurum in statu psychotico et schizophrenico neglexisset et fatigasset, amicoque suo eum stuprare permisisset. Postero die Arthurus Penniam pulvino in valetudinario suffocat.

Arthurus his rebus abstinentiaque medicinarum animo perturbatus habitationem Sophiae necopinato intrat. Sophia perterrita benigne eum, ut discedat, rogat. Ita Arthurum amorem Sophiae sibi mente finxisse patefit.

Ad spectaculum Murrayense invitatus Arthurus a prioribus conlegis Randall et Gary visitatur. Randall ab eo cultro letaliter vulneratur, sed Gary, quod ei benignus fuisset, fugere sinit. Investigatores in Arthuri rixam inquirentes eum in tramen scurris protestantium plenum persequuntur. Arthur rixam incitat, in qua unus investigator casu protestantem sclopetat et necat. Investigatores autem Arthuro effugiente a reliquis protestantibus vapulantur.

In emissione recta programmatis Murrai, Arthurus ioca morbida narrat homicidiaque ferriviae subterraneae a se ipso commissa esse concedit, furibundusque de hominum neglectione adflictorum monet increpans Murraium, quia prius Arthurum inrisisset. Primo edicto ioco Murraium mortifere in caput sclopetat. Arthurus comprehenditur, et tumultus per urbem erumpunt. Expilatores arcerae in currum vigilum Arthurum vehentium incurrunt et eum liberant. Interea quidam seditiosus familiam Wayne in angiportu circumvenit, et Thomam eiusque uxorem Martham coram Bruto interficit. Arthurus suummo curru vigilum stat, ad clamores turbae saltat, et sanguinem faciei suae ut risum inlinit.

Paulo post in moroconio, Arthurus iocum sibi ridet, cum convenit cum nova therapeuta. Dicere ei recusat, quid is iocus sibi velit, nam ab ea non intellegatur. Vestigia calceorum sanguine cruenta relinquit, cum accensus medicus eum persequitur.

Index histrionum (partim)

Ioachimus Phoenix – Arthurus Fleck iocator
Robertus De Niro – Murraius Franklin
Zazie Beetz – Sophie Dumond
Francisca Conroy – Pennia Fleck
Brett Cullen – Thomas Wayne
Shea Whigham – Burke investigator
Bill Camp – Garrity investigator
Glenn Fleshler – Randall
Leigh Gill – Gary
Saron Washington – Therapeuta

Nexus externi

Iudicium pelliculae Italiane