Eques aeneus

Eques aeneus, a tergo visus vespere

Haec pagina de monumento Petropolitano explicat. Si poema Alexandri Puschkin quaeris, vide Eques aeneus (poema).

Eques aeneus monumentum Petro I in Petropoli est, a Stephano Falconet factum. Anno 1782 fixum est. Nominari eques aeneus post poema Alexandri Puškin solet, in quo carmine post inundationem Petrus aeneus vivificatur et per vias Petropolis equitat. Eodem modo et in Petropoli Andreae Belyj eques inductus est.

Petrus a Falconetio sculptus est in corona laurea victoris; super saxum quoddam invectus est et equi cursum tam acriter comprimit, ut equus se efferat; dextram imperator tollit, sicut oratione populum vel exercitum hortaturus. Pes equi anguem proculcat. Saxum graniticum, in quo eques stat, cum magnis laboribus in locum monumenti attractus est; Lapis Tonitrus (Гром-камень) interdum nominatur. Ante faciem Petri Neva flumen, a dextra ecclesia cathedralis sancti Isaacii, a laeva Senatus aedificium.

Bibliographia

• Alexander M. Schenker, The Bronze Horseman: Falconet's Monument to Peter the Great, Yale University Press, New Haven CT, 2003 ISBN 0-300-09712-3. (Anglice)
• Transport du piédestal de la statue de Pierre le Grand, in La Nature, 1882. (Francogallice)

Nexus externi

Situs geographici et historici: Locus: 59°56′12″N 30°18′8″E • Encyclopædia Britannica