Lupus et agnus

E Vicipaedia
Jump to navigation Jump to search

Lupus et agnus (Graece Λύκος καὶ ἀρνίον) est fabula, numerus 155 in indice Perry, 89 in versione Babrii, et prima in libris fabularum Phaedri, quae de iniuriis a potentioribus contra debiliores confectis narrat. Haec sunt verba fabulae:

Ad rivum eundem lupus et agnus venerant
Siti compulsi; superior stabat lupus
Longeque inferior agnus. Tunc fauce improba
Latro incitatus iurgii causam intulit.
"Cur" inquit "turbulentam fecisti mihi
Aquam bibenti?" Laniger contra timens:
"Qui possum, quaeso, facere, quod quereris, lupe?
A te decurrit ad meos haustus liquor".
Repulsus ille veritatis viribus:
"Ante hos sex menses male, ait, dixisti mihi".
Respondit agnus: "Equidem natus non eram".
"Pater hercle tuus, ille inquit, male dixit mihi".
Atque ita correptum lacerat iniusta nece.
Haec propter illos scripta est homines fabula,
Qui fictis causis innocentes opprimunt.[1]

Praeclara sententia circa eundem sensum e hac fabula sumpta est: "Superior stabat lupus."

Dialogus de hac fabula hic inveniri potest.

Notae[recensere | fontem recensere]

  1. Phaedrus, Fabulae Aesopiae 1.1.