De arbore iunipero (fabella Grimmiana)

Marlenula ossa fratris supponit arbori iunipero.

"De arbore iunipero" est fabella Grimmiana "Von dem Machandelboom" inscripta, quae Saxonice exarata anno 1812 divulgata est in collectione fabellarum puerilium Kinder- und Hausmärchen (KHM 47).

Argumentum

Pia uxor viri divitis malum sub iunipero deglubens digitum insecat. Sanguinem adspectans sperat fore, ut infantem habeat, qui rubore sanguineo et candore niveo sit. Deinde nono mense filiolum parit, sed parturiens moritur et, ut voluerat, sub arbore iunipero sepelitur.

Post luctum vir novam ducit uxorem, quae quidem filiolum indignatur, sed filiolam Marlenulam quam parit peramat. Aliquando, cum filia matrem rogat, ut sibi et fratri suo malum det, mater ei dicit, ut fratrem suum opperiatur. Cum filius e schola reversus malum ex arca adprehendere conatur, caputque in arcam porrigit, noverca privigno caput operculo arcae decidit.

Tum capite pueri in collum reposito taeniam collo ita circumligat, ut vulnus obtegatur, puerumque in sella ad ianuam locat, malumque in manum indat. Mater filiam fraude adducit, ut puero alapam ducat. Statim caput pueri decidit. Marlenula plorante mater cadaver privigni discidit in partes, quas in ollam indat et cum aceto coquit. Pater tristi animo filium suum subito ad salutandum propinquos se contulisse audit, sed totum pulmentum avide comedit.

Filia lacrimans ossa fratris colligit et in panno serico supponit arbori iunipero. Rami iuniperi ut manus moventur, et ex igne in nebula ex arbore emissa evolat avis pulchra, evanescuntque ossa. Avis magnifice cantat in domo aurificis et in tecto sutoris, et in tilia, quae ante molam stat. Ut denuo cantet, ab aurifice catenam auream, a sutore calceos rubros, a molitore lapidem molarem accipit. Deinde domi in arbore iunipero cantans patrem beatum facit sed matrem perterret. Avis catenam in collum patris demittit et calceos sorori deicit, et ambo gaudent. Exit etiam mater, et avis mola in caput iacta eam interficit. Tum filius ex vapore et flamma apparet, et pater laetus cum liberis cenat.

Bibliographia

• Belgrader, Michael (1980) Das Märchen von dem Machandelboom. Peter Lang.
• Burkert, Walter (1984) Vom Nachtigallenmythos zum Machandelboom. Antiker Mythos in unseren Märchen, 113–125, ed. W. Siegmund. Röth, Kassel.
• Schmidt, Leopold (1963) Die Volkserzählung. Märchen, Sage, Legende, Schwank. Berlin.
• Uhsadel-Gülke, Christina (2008) Knochen und Kessel. (Beiträge zur klassischen Philologie, 43). Hain.

Nexus externi

Vicimedia Communia plura habent quae ad arborem iuniperum spectant.

• Vicifons
• Danielae Tax interpretatio
• conspectus in fabellarum lexico