Barbara Pym

E Vicipaedia
Jump to navigation Jump to search

Barbara Pym (nata in Albo Monasterio (Anglice: Oswestry) die 2 Iunii 1913; Oxoniae mortua die 11 Ianuarii 1980) fuit scriptrix Anglica.

Vita[recensere | fontem recensere]

Barbara Pym filia advocati Frederick Crampton Pym eiusque uxoris Irenae Spenser Thomas fuit.[1] Litteris Anglicis studebat in Collegio Sanctae Hildegardis Universitatis Oxoniensis. Ibi consuetudinem cum Roberto Liddell contraxit eique in amicitia ambigua iunxit. Studiis finitis domi apud parentes manere malebat: iter Polonicum anno 1938 inceptum, ubi Katovici linguam Anglicam ad lares quosdam doceret, ob res politicas mox interrumpi debuit.

Secundo bello mundano saeviente in principio Oswestry in Salopiensi comitatu sponte sua laborabat antequam anno 1941 ab auctoritatibus censurae faciendae Bristolium mitteretur. Annis inter 1943 et 1946 copiae navali Britannicae servitia offerebat. Classis eam anno 1944 Neapolim delegavit. Postea Londinii in Instituto Africano Internationali operam dabat, quod munus usque annum 1974 pergebat.

Anno 1950 mythistoria in versione paululum adaptata publicata est, cui titulus Some Tame Gazelle. Quinque fabulae Milesiae usque annum 1961 consecutae laudibus criticorum atque fidelitate lectorum gavisae sunt.[2] Argumenta eius tranquilla et ironia (primo visu) sat clemens temporibus mutantibus magis magisque errabant captatione benevolentiae labente. Quamobrem opus An Unsuitable Attachment (anni 1963) in lucem proferri non potuit lectoribus deficientibus. Scriptrix contrita et maestitia confecta nihil morata est quominus vulgum despiceret et editiones publicas horreret. Anno 1971 carcinoma mammae eius exsectum est.

Anno 1977 autem periodicum "The Times Literary Supplement" gloriam auctricis restituebat Philippo Larkin et barone Davido Cecil agentibus. Fabula Romanensis Quartet in Autumn eodem anno publicata Praemio Booker proposita est. Barbara Pym in novissimis tribus annis honoribus multis fructa est: editiones librorum anastaticae factae sunt et scriptrix ipsa ad multa colloquia percontativa invitata est. Insuper symbolas suas ephemeridibus dedit ut prelo mandarentur. Corporatio radiodiffusionis Britannica de scriptrice emissionem amabilem praetitulatam Tea with Miss Pym paravit eam Finstock in Oxoniensi comitatu visitans. Ibi cum sorore et multis murilegis vitam degebat. Anno 1979 Regalis Societas Litterarum Barbaram Pym in gremio suo accepit.

Anno 1979 cancro iterum tumenti laborans opus ultimum terminavit. Cuius exemplar primum correptioni patens tamen ab auctrice relegi non iam potuit.

Opera eius lectores captant quae universalia et res generaliter validas describunt atque praesentant. Condicionis humanae ridicula modum in amabilem cavillis parvis designantur. Scriptrix insuper pluma admirat quomodo vitae quotidianae provocationes atque tentamina a hominibus superentur.

Opera selecta[recensere | fontem recensere]

  • Some Tame Gazelle (1950)
  • Excellent Women (1952)
  • Jane and Prudence (1953)
  • Less than Angels (1955)
  • A Glass of Blessings (1958)
  • No Fond Return of Love (1961)
  • Quartet in Autumn (1977)
  • The Sweet Dove Died (1978)
  • A Few Green Leaves (1980)
  • An Unsuitable Attachment (scriptum 1963; ed. 1982)
  • Crampton Hodnet (finitum circa 1940, ed. 1985)
  • An Academic Question (scriptum 1970–72; ed. 1986)
  • Civil to Strangers (scriptum 1936; ed. 1987)

Bibliographia[recensere | fontem recensere]

Notae[recensere | fontem recensere]

  1. Larkin: "Pym, Barbara Mary Crampton", in John Sutherland (ed.): Literary Lives – Intimate Biographies of the Famous by the Famous, p. 276.
  2. Larkin, p. 277

Nexus externi[recensere | fontem recensere]