Cartilagines arytaenoideae
Cartilagines arytaenoideae[1] (adiectivum a vocabulo Graeco ἀρύταινα 'urna, situla' deductum) sunt binae pyramides cartilagineae in postrema larynge ad superiorem cartilaginis cricoideae laminam ita adligatae, ut per commissuram cricoarytaenoideam expedita mobilitate fungi possint.
Partes cartilaginis arytaenoideae [recensere]
Utrique pyramidi, dextrae et sinistrae, hae sunt partes principales: apex, basis, processus muscularis, processus vocalis.[2]
Apex est summa cartilago, paululum retro flexa, cuius cacumen in cartilaginem corniculatam, nodulum conicum, exit.
Basis est concava cartilaginis arytaenoideae facies, quae cum convexa cartilaginis cricoideae facie copulata versatilem efficit commissuram.
In proiectione antica, prope apicem cartilaginis, colliculus rotundus est, a quo crista arcuata primum retro, deinde deorsum, denique ad processum vocalem flectitur, cui plica vocalis inserta est ab altero fine.
Processus muscularis sive arytaenoideae pyramidis proiectio lateralis est locus in quem inserti sunt musculi, quibus adducuntur et abducuntur plicae vocales. Musculus arytaenoideus transversus et bini musculi arytaenoidei obliqui adductorii sunt, quibus plicarum vocalium rima aut contrahitur aut concluditur. Musculus cricoarytaenoideus posterior plicas vocales abducit.
Notae [recensere]
- ↑ Appellatio et descriptio cartilaginis arytaenoideae (χόνδρος ἀρυταινοειδής) iam apud Galenum (De usu partium 7.11) leguntur.
- ↑ Seikel & King & Drumright (2009: 182); Schneiderman & Potter (2001: 49); illustris cartilaginis arytaenoideae descriptio ante oculos posita apud Salerno medizinisches wissen online.
Bibliographia [recensere]
- Schneiderman, Carl R. & Potter, Robert E. (2002) Speech-Language Pathology. A Simplified Guide to Structures, Functions, and Clinical Implications. Academic Press.
- Seikel, John A. & King, Douglas W. & Drumright, David G. (2009) Anatomy and physiology for speech, language, and hearing. 4th ed. Cengage Learning.
