Vide, qui nosti litteras

Conferatur pagina principalis: Index Carminum Buranorum.

Vide, qui nosti litteras
Numerus	CB 23
Argumenta	avāritia
Lingua	lingua Latina mediaevalis
← Homo, quo vigeas vide!Iste mundus furibundus →

“Vide, qui nosti litteras” incipit carmen a discipulis vagantibus Latine scriptum, quod in codice Carminum Buranorum sub numero XXIII reperitur.

Textus

Vide, qui nosti litteras

et bene doces vivere,

quid sit doctrina littere,

de quo et ad quid referas.

diligenter considera,

si sis doctor, quid doceas,

et quod doces, hoc teneas,

ne tua perdant opera

eterna Christi munera.

Vide, qui colis studium

pro Dei ministerio,

ne abutaris studio

suspirans ad dispendium

lucri, nec te participes

coniuge vite vitio;

namque multos invenio,

qui sunt huius participes,

ecclesiarum principes.

Vide, qui debes sumere

religionis gloriam

summi per Dei gratiam,

ne te possit decipere

nec trudat in interitum

Philisteus improvide

– namque prodent te Dalide –

ut non amittas meritum,

Deus, tuorum militum.

Descriptio

Hoc carmen est exhortatio moralis et satira directae ad litteratos, doctores, et ecclesiae principes, monens eos de necessitate congruentiae inter verba et facta. Auctor incipit admonendo illos qui “litteras norunt” ut diligenter considerent quid doceant, ne per hypocrisim et malam vitam praemia aeterna Christi amittant.

In secunda parte, carmen clericos et scholares reprehendit qui studio abutuntur non ad Dei ministerium, sed ad avaritiam et lucrum mundanum spectantes. Scriptor acerbe notat multos “ecclesiarum principes” his vitiis implicari, vitam spiritualem cum vitiis saecularibus foedantes.

Ultima strophe allegoria biblica utitur, religiosos commonens ne a “Philisteo” (hoc est, a diabolo vel peccato) decipiantur nec a “Dalide” (cupiditate vel illecebris mundi) prodantur. Finis carminis est precatio ut milites Dei meritum suum non amittant et ad interitum propter imprudentiam moralem non trahantur.

Bibliographia

• Lehtonen, Th. M. S. (1995). Fortuna, Money, and the Sublunar World: Eleventh-century Ethical Thought as a Paradigm for Late Medieval Moral Philosophy. Helsingiae: Societas Litterarum Finnicarum. ISBN 978-951-717-846-4

• Ostendere
• Recensere
• Historiam inspicere

Carmina Burana