Velimirus Chlebnikov

Velimirus Chlebnikov

Res apud Vicidata repertae:

Velimirus Chlebnikov: imago

Nativitas: 28 Octobris 1885; Malye Derbety
Obitus: 28 Iunii 1922; Ruchi, Krestetsky District
Patria: Imperium Russicum, Russica Sovietica Foederativa Socialistica Res Publica

Familia

Genitores: Vladimir Khlebnikov;

Memoria

Sepultura: Sepulcretum Novodevicense

Velimirus (vero nomine Victor Vladimiri filius) Chlebnikov (Russice Велимир [Виктор Владимирович] Хлебников, 28 Octobris 1885 in Derbetis Minoribus (Malyje Derbety) gubernii Astrachanensis natus et 28 Iunii 1922 in Rivis (Ruč'i) nunc regionis Novogardiensis mortuus) fuit poeta Russicus, futurismi conditor et dux; saepe futuristarum primus et optimus putatur.

Vita et opera

Pater Victoris ornithologus fuit, qui saepe locum mutabat; in Calmuccia hodierna natus, in gubernio Volhyniensi et Simbiriensi Victor puer habitabat, Simbirio cursum gymnasii incepit, Casani finivit. In Universitate Casanensi ornithologiam studuit (ad annum 1906) et aliquod tempus huic scientiae operam dabat, expeditiones in Daghestaniam aliosque locos fecit cuculique speciem novam descripsit. Versus componebat post annum 1906, quos Venceslao Ivanov monstravit eique et Alexio Remizov aliusque symbolistis circa annum 1910 familiaris fuit. Tunc et fratres Burliuk cognovit, quibuscum domum editioriam Hylaeam condidit; ei et Alexium Kručënych Vladimirumque Majakovskij in gregem novam invitaverunt; sic futurismus Russicus ortus est. Librorum primorum futuristarum, ut Piscinilla iudiciorum (Sadok sudej) et Alapa gustui publico (Poščečina obščestvennomu vkusu) particeps fuit multosque libros alios suos et communes (cum Kručënych et Paulo Filonov aliisque) edidit.

Tempore belli orbis terrarum prioris Astrachani et Petropoli et in aliis locis vivebat; anno 1916 Petropoli Societatem praesidum Globi Telluris (Obščestvo predsedatelej Zemnogo Šara) condidit. Anno 1916 in exercitum vocatus est, sed mox dimissus; Charcoviam saepe visitabat. Annis rerum novarum et belli civilis pemultum per totam Russiam vagabatur et anno 1921 Gilaniam visitabat, ubi res publica Sovietica Socialistica Gilaniae condita est. Petropolim cum revertit aeger factus est in domo Petri Miturič (qui postea Fidem sororem poetae nupsit) mortuus est.

Permulta et versu et oratione soluta scripsit operumque zaumicorum aliqua famosissima (ut bobèobi) etiam ab eo composita sunt. Opus, cui annis vitae ultimis maximam operam dabat, est Tabulae fati (Doski sud'by), tractatus historicus ubi formulam fortunae hominum communis Chlebnikov deducere temptat.