Jump to content

Trentepohlia

E Vicipaedia
Trentepohlia sp. in cortice Cryptomeriae japonicae crescens, maculas aurantiacas efformans.
Classis : Ulvophyceae 
Ordo : Trentepohliales 
Familia : Trentepohliaceae 
Genus : Trentepohlia 
 
C.Martius (nom. cons.)  

Trentepohlia est genus algarum terrestrium classis Ulvophycearum.

Descriptio

[recensere | fontem recensere]

Trentepohliae sunt plantae epiphyticae, in substratis pervariis crescentes, ut in cortice arborum, supra petras murosque, vel in foliis, sed nonnumquam etiam humi.[1] Thalli earum caespites saepe magnos efformant, e longinquo faciles visu dignoscituque ob colorem aurantiacum, aureum vel fulvum.[2]

Thallus filamentosus, ramosus. Generationes alternantes, sed gametophytum sporophyto simillimum.[1]

Nonnullae Trentepohliae, in associationes symbioticas cum ascomycotis intrantes, lichenes efformant. Apud quartam circiter partem lichenum alga ad familiam Trentepohliacearum pertinet.[3][4]

Trentepohliae in locis praesertim humidiusculis inveniuntur, saepe in tropicis, sed haud raro etiam in zona temperata.[5][6]

Nomenclatura

[recensere | fontem recensere]

Nomen huius generis, a Carolo Friderico Philippo Martio anno 1817 creatum,[2] Ioannem Fridericum Trentepohl (1748–1806), botanicum Theodiscum commemorat.[7] Typus generis est Trentepohlia aurea (L.) C.Martius [≡ Byssus aurea L.][8] Genus vero Trentepohlia est typus familiae Trentepohliacearum, familiae unicae ordinis Trentepohlialium.[9]

Pinacotheca

[recensere | fontem recensere]
  • Variae species Trentepohliarum sub microscopio visae: filamenta thallorum conspiciuntur.
    Variae species Trentepohliarum sub microscopio visae: filamenta thallorum conspiciuntur.
  • Reproductio Trentepohliae uncinatae: rami sporophyti sporocystes efformantes.
    Reproductio Trentepohliae uncinatae: rami sporophyti sporocystes efformantes.
  • Rami Hesperocyparidis macrocarpae a Trentepohlia aurea operti ad locum Point Lobos dictum in California.
    Rami Hesperocyparidis macrocarpae a Trentepohlia aurea operti ad locum Point Lobos dictum in California.
  • Trentepohlia sp. in muro ad locum Fort Variselle dictum in Sabaudia.
    Trentepohlia sp. in muro ad locum Fort Variselle dictum in Sabaudia.

Notae

[recensere | fontem recensere]
  1. ↑ 1.0 1.1 de Reviers, Bruno (2003) Biologie et phylogénie des algues. Parisiis: Belin. ISBN 9782701135120.
  2. ↑ 2.0 2.1 Martius, C. F. P. (1817) Flora cryptogamica Erlangensis, sistens vegetabilia e classe ultima Linn. in agro Erlangensi hucusque detecta. Norimbergae.
  3. ↑ Nelsen, M.P., Rivas Plata, E., Andrew, C.J., Lücking, R. & Lumbsch, H.T. (2011) Phylogenetic diversity of trentepohlialean algae associated with lichen-forming fungi. Journal of Phycology, 47 (2): 282–290.
  4. ↑ Hametner, Christina, Stocker-Wörgötter, Elfrida & Grube, Martinus (2014) New insights into diversity and selectivity of trentepohlialean lichen photobionts from the extratropics. Symbiosis, 63 (1): 31–40.
  5. ↑ Rindi, F., Sherwood, A.R. & Guiry, M.D. (2005) Taxonomy and distribution of Trentepohlia and Printzina (Trentepohliales,Chlorophyta) in the Hawaiian Islands. Phycologia, 44: 270–284.
  6. ↑ Rindi, F., Guiry, M.D., Critchley, A.T. & Ar Gall, E. (2003) The distribution of some species of Trentepohliaceae (Trentepohliales, Chlorophyta) in France. Cryptogamie, Algologie, 24 (2): 133–144.
  7. ↑ Burkhardt, L. (2022) Eine Enzyklopädie zu eponymischen Pflanzennamen: Von Menschen & ihren Pflanzen. Berolini: Botanic Garden and Botanical Museum Berlin, Freie Universität Berlin. ISBN 978-3-946292-41-8
  8. ↑ Trentepohlia aurea [Alagebase, in interreti].
  9. ↑ Trentepohliales [Algaebase, in interreti].
Receptum de "https://la.wikipedia.org/w/index.php?title=Trentepohlia&oldid=3881132"