Titus Ampius Balbus
Titus Ampius Titi filius Balbus e tribu Horatia (floruit medio primo saeculo a.C.n.) fuit senator Romanus qui provinciae Asiae praefuit. Partes Pompeianas vel, si ita malueris, senatorias bello civili secutus tam acriter ad bellum adversus Caesarem incitabat ut a Caesarianis tuba belli civilis[1] appellaretur. Vitas magnorum virorum litteris mandare quoque studebat[2] nec in scriptis hodie deperditis Gaio Iulio Caesari parcebat[3].
De cursu honorum[recensere | fontem recensere]
- 63 a.C.n. tribunus plebis cum Tito Labieno per populum honores inauditos Pompeio decrevit, ut ei ludis circensibus et scaenicis coronam auream gerere liceret atque etiam circenses spectare triumphali habitu ornatus[4].
- 59 a.C.n. Praetor
- 58-57 a.C.n. Proconsul Asiae, quod ostendunt cistophori Ephesiani, Pergamenses, Laodicenses, Trallenses eius nomen praeferentes[5]
- 57-56 a.C.n. Ciliciam fortasse post Asiam pro praetore rexit[6]
- 55 a.C.n. frustra consulatum petivit. Quamvis suffragante Pompeio repulsam rettulit[7].
- Anno 49 a.C.n. ineunte, Caesare Italiam invadente, Titus Ampius dilectus Capuae strenue habebat[8] ut milites Pompeio praestaret. Aestate eiusdem anni legatus pro praetore in Asia versabatur, ut ex actis publicis a Iudaeo historico Flavio Iosepho nobis servatis[9] apparet.
- 48 a.C.n. post cladem Pharsalicam pecuniam Dianae Ephesiae in templo servatam fugiens tollere volebat quidem sed Caesare properanter adveniente ab incepto prohibitus est[10]
- 46 a.C.n. a Caesare qui eum exsilio multaverat veniam cum per alios tum etiam per Ciceronem impetravit ; certe Romam redire ei licuit. Quo nuntiato Cicero epistulam gratulatoriam, ubi operam in ea re a se datam demonstrabat, Ampio Balbo misit, quam epistulam hodieque legere possumus[11].
Notae[recensere | fontem recensere]
- ↑ Cicero, Ad fam. VI.12
- ↑ Ad fam. VI.12 ː cum studium tuum consumas in virorum fortium factis memoriae prodendis...
- ↑ Suetonius, Divus Iulius 77
- ↑ Velleius Paterculus II.40.4
- ↑ Broughton, Magistrates of the Roman Republic II.197. T. Corey Brennan (2001), The praetorship in the Roman Republic II p.568
- ↑ Cicero, Ad fam I.3 et III.7(5) (nam Lentulus Spinther Tito Ampio in Ciliciam succedere potuit). Vide commentarium apud T. Corey Brennan (2001), The praetorship in the Roman Republic II pp 573-574, qui etiam utitur oratione Ciceronis Pro Domo 23.
- ↑ Scholiasta Bobiensis 156St.
- ↑ Ad Att. VIII.11B.2
- ↑ Ant. Iud. XIV.230 et 238
- ↑ Caesar, BC III.105.
- ↑ Ad fam. VI.12