Jump to content

The Night of the Hunter (pellicula 1955)

E Vicipaedia
The Night of the Hunter (1955)
DispositorCarolus Laughton
ScriptorDavis Grubb
Primi actoresRobertus Mitchum
Shelley Winters
Lilliana Gish
CompositorWalter Schumann
Duratio93 minuta
LinguaAnglica

The Night of the Hunter est pellicula horrifica ad genus film noir vergens, albo nigroque distincta colore. Dispositor pelliculae fuit Carolus Laughton, homo histrionia arte inlustrior, qui post hanc anno 1955 confectam taeniam nullam iam pelliculam disposuit. Etsi suo tempore parum in gratia esset, postea inter studiosos fama crevit statumque operis classici nacta est.

Argumentum

[recensere | fontem recensere]

Annis 1930, cum Civitates Foederatae Americae depressione oeconomica discerpitur, sedes argentaria a Benedicto Harper spoliatur, quo consilio desperato duos liberos et uxorem Willam sustentare posse putat. Duo homines in rapina a Benedicto Harper occiduntur. Benedictus decem milia dollariorum, pecuniam furto surreptam, intra filiae suae Margaritae pupam pannosam celat, et filiam quinquennem decennemque filium iubet, ne locum pecuniae patefaciant. Vigiles mox adveniunt. Benedictum abducunt, qui sceleris ad suspendium condemnatur.

In carcere, Harper supplicium opperiens Harrium Powell fraudulentum praedicatorem a se ipso creatum cognoscit, qui, quadam iuncta amicitia, frustra illum de pecunia indicia quaerit. Powell, postquam liberatus est, oppidum patrium Benedicti Harper profectus familiam eius convenit. Willa vidua amore praedicatoris blandiloqui capta est, et mox ei nubit.

Robertus Mitchum et Shelley Winters

Ioannes filius ab initio novum "patrem" familiae suspicatur, et sororculam obsecrat, ne pecuniam reconditam patefaciat. Willa actionibus praedicatoris narcissisti primum morigeratur. Incohat enim cum novo marito in conventibus tentoriis praedicare. Quondam in tabernaculo spirituali nuntiat pecuniam in profundum fluminis per oppidum fluentis decidisse. Demum Willa maritum suum nihil nisi pecuniam aucupari intellegit. Itaque Powell eam occidit, et corpore huius in flumen deiecto affirmat uxorem suam effugisse, ut vitam inpiam ageret.

Liberos scire, ubi pecunia celata sit, certior factus statuit indicia ex eis uno vel altero modo exprimere. Liberi tandem receptabulum pecuniarum revelare coguntur. Attamen liberis cum pupa effugere et navicula secundo flumine devehi contingit. Powell autem equum furatus eos flumine deorsum sequitur.

Liberi ad tempus in infra loco fluminis novam inveniunt familiam, quae ex liberis minoris aetatis constat, qui familias suas amiserunt. Quibus consulit Rachel Cooper (Gish) muulier strenua. Qui mox a Powell inveniuntur, sed dominae Cooper eum a domo sua sclopeto arcere contigit. Powell vulneratus a vigilibus capitur, qui interfector serialis multas feminas interfecisse revelatur. Ioannes, cum comprehenditur Powell, festinat pupa sororculae eum verberare. Sed ictibus chartae pecuniariae ex pupa erumpuntur. Powell capite damnatur. Liberi apud dominam Cooper remanent sic novam familiam feliciter nacti.

Partium distributio

[recensere | fontem recensere]
Partes primariae
Partes secundariae

Bibliographia

[recensere | fontem recensere]
  • Couchman, Jeffrey (2009) The Night of the Hunter: A Biography of a Film. Northwestern University Press.
  • Jones, Preston Neal (2002) Heaven & Hell To Play With: The Filming of The Night of the Hunter. Limelight Editions.
  • Prose, Francine (2016) The primal pull of Charles Laughton’s The Night of the Hunter. The Moviegger, 6 Octobris (Library of America).
  • Ziegler, Damien (2008) La Nuit du chasseur, une esthétique cinématographique. Bazaar & co.
Receptum de "https://la.wikipedia.org/w/index.php?title=The_Night_of_the_Hunter_(pellicula_1955)&oldid=3954448"