Testudo et lepus

Cursus testudinis et leporis, a Milone Winter pictus

"Testudo et lepus" (Graece "Χελώνη καὶ λαγωός") est fabula Aesopi, qui 226 in indice Perry numerata est. Haec fabula cursum inter testudinem et leporem certatum tractat, deinde ad comparationem desidiae et industriae spectat. Versio quae ex antiquitate exstat prosa oratione scripta est.

Versio fabulae

Haec est versio Latina fabulae a Francisco de Furia facta:

Pedes Testudinis Lepus olim deridebat. Cui illa subridens, Ego vero, inquit, te quamvis velocem, in cursu tamen superabo. Quod impossibile omnino fore Lepus affirmans, Mecum, inquit, o Testudo, in certamen veni, et mei quid pedes valeant, aperte cognosces. Cui Testudo adsibilans, Ecquis nobis, ait, cursus metam describet, ac victoriae laudem decernet? Tunc Vulpes, burtorum omnium sagacissima, initium ac metam nec non curriculi locum designavit. Testudo itaque nulla mora interiecta, iter illico arripiens ad praescriptum terminum tandem pervenit; sed Lepus interea suis pedibus nimium confidens, placidum soporem captavit. Deinde vero somno excitatus, effuso cursu ad metam et ipse contendit, at ibi Testudinem dormientem invenit.

Declarat haec fabula, multos homines ad res conficiendas egregie natura esse conformatos, sed mollitie atque socordia perditos fieri. Contra vero, studio atque labore naturae vitia quamplurimos superare.

Nexus externi

Vicimedia Communia plura habent quae ad "Testudinem et Leporem" spectant.

• Fabula Graeca, ex editione Chambry