Catharina Aragonensis

Catharina Aragonensis

Catharina Aragonensis (nata Catalina de Aragón die 16 Decembris 1485 in Compluto - mortua est die 7 Ianuarii 1536 in oppido Cinnibantensi) erat prima e sex uxoribus Henrici VIII, regis Angliae. Parentes erant reges Catholici dicti (Elisabetha I Castellae et Ferdinandus II Aragoniae).

Anno 1501 Catharina filio Henrici VII Angliae, Arthuro Tudori, nupsit. Cum Arturus princeps Cambriae esset, ad castellum Ludensis in Cambria missus est ad consilium Cambriae ducendum. De more Catharina maritum suum comitata est. Aliquot menses post pestilentiam Arthurum sumpsit, Catharina ipsa vix supervivente. Summus pontifex Christianorum ei concessit ut fratrem minorem Arthuri, futurum regem Angliae Henricum VIII, in matrimonium acciperet (Henricus VIII eam in matrimonium duxit testamenti patris causa). Hoc matrimonium anno 1509 post coronationem Henrici VIII factum est.

Catharina Aragonensis erat sat populo grata, et matrimonium duodeviginti annos felix fuisse videtur. At Henricus sollicitabatur quod uxor eius filium (et successorem) non peperisset. Primus infans anno 1510 iam mortuus natus est. Anno 1511 filius Henricus natus est, sed iam post quinquaginta duos dies mortuus est. Postea Catharina iterum infantem mortuum peperit, et filius secundus etiam mox mortuus est. Mense Februarii anno 1516 filia Maria nata est - futura Maria I, regina Angliae. Anno 1518 ultimum infantem mortuum peperit.

Annis seris matrimonii Henricus VIII aliquas concubinas habuit. Denique Henricus Annam Bolinam (Anne Boleyn) - sororem unius ex illis concubinis - sub rosa in matrimonium ducit, et die 23 Martii 1533 decrevit matrimonium cum Catharina irritum esse. Ius canonicum Ecclesiae autem divortium civile illius generis non approbabat. Idcirco mense Martii 1534 Henricus a Papa petivit ut divortium permitteret, sed Papa Clemens VII recusavit.

Postea Henricus reformationem Ecclesiae Anglicae pertulit. Denique Ecclesia Anglica ab Ecclesia Catholica secessit. Catharina ipsa numquam divortium probavit et ob eam rem coacta est ut in castellis remotis viveret: Henricus speravit Catharinam ob tales condiciones vitae humiles tandem divortium probaturam esse. Erravit.

Anno 1536 Catharina Aragonensis in castello Cinnibantensi mortua et in ecclesia cathedrali Petroburgensi sepulta est. Neque Henricus VIII neque filia sua Maria (ob prohibitionem patris eius) aderant.

Picturae

• Regina Katherina eius uxor

Fontes Selecti

Haec opera, inter alia, ad Catharinam Aragonensem spectant.

• 1530, Foxi Gravissimae, atque exactissimae illustrissimarum totius Italiae, et galiae academiarum censurae
• 1531, Ferdinandi de Loazes Solennis atque elegans tractatus in causa matrimonij serenissimorum dominorum Henrici et Catherine Anglie regum
• 1638, Francisci Baconis Historia Regni Henrici Septimi Regis Angliae textus
• 1668, Ioannis Cluveri Epitome Historiarum (in appendice, p. 737-8) textus

Nexus externus

Vide Catharinam Aragonensem in Victionario.

Uxores Henrici VIII

Catharina Aragonensis 1485-1536	Anna Bolena 1507-1536	Ioanna Seimora 1509-1537	Anna de Clivis 1515-1557	Catharina Hauarda 1521?-1542	Catharina Parra 1512-1548