Natalia Gončarova

Natalia Sergii filia Gončarova (Russice Наталья Сергеевна Гончарова, die 21 Iunii^[1] anno 1881 in Ladyžino gubernii Tulensis nata et 17 Octobris 1962 Lutetiae mortua) erat pictrix artis protoporiacae Russicae.

Vita et opera

In familia nobili nata et Nataliae Gončarovae-Puškinae cognata, in villis familiaribus annos pueritiae degit. Ab anno 1891 in Moscua, arti studuit ab anno 1901 magistris Paulo Trubeckoj, Sergio Volnuchin, Constantino Korovin. Anno 1900 vel 1901 Michaelem Larionov cognoverat, cuius socia et coniunx per totam vitam mansit. Ab anno 1910 socia Equitis rhombulorum, ab anno 1912 libros communes cum futuristis (Alexio Kručënych, Velimiro Chlebnikov aliisque) fecit et theatris multis operam dedit. Tum et lučismum (i.e. radiismum, de Russico luch, radius lucis) Gončarova et Larionov excogitaverunt. Anno 1912 a Sergio Djagilev invitata Lutetiam venit, sed bello orbis terrarum priore ineunte Moscuam revertit, ubi anno 1915 expositio eius in Russia ultima facta est; eodem anno in Franciam abiit nec revertit.