Fides cum Ydolatria

Conferatur pagina principalis: Index Carminum Buranorum.

Fides cum Ydolatria
Numerus	CB 46
Argumenta	Professio religiosa
Lingua	lingua Latina mediaevalis
← Roma tenens moremCrucifigat omnes →

“Fides cum Ydolatria” est initium carminis a discipulis vagantibus Latine scripti, quod in codice Carminum Buranorum sub numero XLVI reperitur.

Textus

Fides cum Ydolatria

pugnavit, teste gratia,

agresti vultu turbida,

mundi non querit tegmina,

sed forti fidens pectore,

dives una cum paupere.

Propheta teste misera

tu Babylonis filia,

beatus est, qui parvulos

petre collidit tuos.

prisci das penas sceleris

Chaldea nunc metropolis.

Iohannes super bestiam

sedere vidit feminam

ornatam, ut est meretrix,

in forma Babylonis.

sed tempus adest calicis

ad feces usque sceleris.

Princeps vocatur principum,

qui colla premit gentium,

costam scandat tetragoni

sedentis ut eterni,

sub Herculis memoria

vexilla ponens rosea.

Navis in artemonem

quem Deus ponet hominem,

velum triangulatum

cuius regat pulcherrimum?

hoc militum tripudio

letetur Pacis Visio!

Confusionis civitas

decepit te, Gentilitas,

inniteris harundini

cladem lature manui;

revertere, revertere,

factoris opus respice!

Qui colunt cacodemones,

non fiunt illis similes,

qui fibris non utuntur,

dum illis insculpuntur,

nec vox inest nec ratio

nec locus in arbitrio?

Beati sunt mucrones,

quos portant Christi milites

suffulti crucis tegmine,

sub cuius gaudent robore,

quorum felix atrocitas

constringit te, Gentilitas.

De viis atque sepibus

et mundi voluptatibus

compellimur intrare,

nunc nuper epulare

gustu sepe medullitus;

quam suavis sit Dominus.

Nam panis filiorum

fit cibus catulorum

sub mensa pii Domini

de verbis evangelii;

gaude, Syrophenissa!

iam venit tua filia.

Forum est Ierosolymis

in campo libertatis,

quod Rex regum instituit.

mercator prudens aderit;

qui vitam velit emere,

festinet illuc currere!

Non tamen ita properet,

quin coniugi provideat

de rebus necessariis

una cum parvis liberis;

quod quidem nisi faciat,

ignoro quid proficiat.

Sepulcrum gloriosum

prophetis declaratum

impugnatur a canibus,

quibus sanctum non dabimus,

nec porcis margarite

mittuntur deridende.

Ad multas mansiones

in domo patris stabiles

nummi trahit conventio;

nec gravet operatio:

pondus diei preterit,

merces perennis aderit.

Novissimus fit primus

et primus fit novissimus;

dispar quidem vocatio,

sed par remuneratio,

dum cunctis laborantibus

vite datur denarius.

Non hic mutatur sedes,

non corrumpuntur edes,

non maior hic minori,

non pauper ditiori,

non obstat alter alteri,

nec locus est opprobrii.

Descriptio

Hoc carmen, in sectione moralium et satiricorum sub titulo De cruce signatis servatum, hortatur christianos ad expeditionem sacram suscipiendam. Per multas metaphoras biblicas, auctor pugnam inter Fidem et Idolatriam describit, ubi Babylon (symbolum Gentilitatis vel inimicorum crucis) expugnanda est ad Hierosolyma liberanda. Textus multas reminiscentias habet tam ex prophetis veteribus quam ex Apocalypsi, ubi mulier super bestiam sedens cum confusione mundi comparatur.

In secunda parte, carmen extollit milites Christi qui sub signo crucis pugnant, promittens eis remunerationem aeternam in domo Patris. Argumentum ad parabolam operariorum in vinea (ubi novissimus fit primus) et ad cenam Domini refertur, ut lectores moneantur de necessitate mercandi vitam aeternam per laborem peregrinationis et defensionem Sepulcri gloriosi.

Bibliographia

• Lehtonen, Th. M. S. (1995). Fortuna, Money, and the Sublunar World: Eleventh-century Ethical Thought as a Paradigm for Late Medieval Moral Philosophy. Helsingiae: Societas Litterarum Finnicarum. ISBN 978-951-717-846-4

• Ostendere
• Recensere
• Historiam inspicere

Carmina Burana