Chordata

Chordata Aetas fossilium: Cambrico inferiore – Recens, 540–0 Ma PreЄ Є O S D C P T I K Pg N
Pristella maxillaris, una ex paucis Chordatis quibus est columna vertebralis conspicua. Chorda dorsalis intra hanc columnam est.
Taxinomia
Regnum:	Animalia
Subregnum:	Bilateria
Superphylum:	Deuterostomia
Phylum:	Chordata Bateson, 1885
Clades
Craniata Cephalochordata Urochordata

Chordata (nomen a Bateson anno 1885 excogitatum) sunt phylum Animalium quae sunt vel Vertebrata vel unum nonnullorum invertebratorum arte cognatorum. Coniuguntur ob chordam dorsalem seu notochordam, tubum neuralem concavum, sulcos pharyngeos, endostylum, caudam post anum, quas proprietates saltem nonnullo vitae momento omnia habent. Phylum in tribus subphylis consistit: Urochordatis sive Tunicatis, Cephalochordatis (ab Amphioxiformibus repraesentatis), Craniatis (quae Vertebrata et pauca alia comprehendunt). Hemichordata appellata sunt quartum quondam Chordatorum subphylum, quod nunc phylum proprium usitate tractatur. Larvis Urochordatorum sunt notochorda nervorumque chorda quae in adultis amittuntur. Cephalochordatis sunt notochorda nervorumque chorda (sed nullum cerebrum vel propria sensuum organa) et simplicissimum systema circulatorium. Craniata sunt solum phylum cuius membris sunt calvariae. In omnibus Craniatis, Myxinis exceptis, tubus neuralis vertebris cartilagineis aut osseis cingitur, et notochorda est generatim deminuta; ergo Myxiniformes Vertebrata non putantur. Chordata uná cum tribus phylis germanis —quae sunt Hemichordata, Echinodermata, Xenoturbellida— Deuterostomia constituunt, unum ex duobus superphylis quae omnia Animalia pluribus organis praedita (Nephrozoa) comprehendunt (alterum Protozoa sunt).

Nexus externi

Vicimedia Communia plura habent quae ad Chordata spectant.

Vide Chordata apud Vicispecies.

• Chordata apud Systema Natura
• Chordata apud Universitatem Berkleiensem
• Chordata apud Animaldiversityweb