Archibaldus Iosephus Cronin

Archibaldus Iosephus Cronin

Res apud Vicidata repertae:

Archibaldus Iosephus Cronin: imago

Nativitas: 19 Iulii 1896; Cardross
Obitus: 6 Ianuarii 1981; Montreux
Patria: Britanniarum Regnum, Britanniarum Regnum
Nomen nativum: Archibald Joseph Cronin

Familia

Coniunx: Agnes Mary Gibson
Proles: Vincent Cronin, R. F. Patrick Cronin

Memoria

Sepultura: La Tour-de-Peilz

Archibaldus Iosephus vel saepissime A. J. Cronin (Anglice Archibald Joseph Cronin, natus die 19 Iulii 1896 in oppido Cardross Dumbartonensis; mortuus die 6 Ianuarii 1981 in urbe Montreux Helvetiae) fuit medicus ac scriptor origine Scoticus qui postea in Civitatibus Foederatis et in Helvetia habitabat.

Biographia

In Scotia natus e patre catholico cuius parentes ex Hibernia immigraverant et matre presbyteriana, septem tantum annos natus orbus a patre relictus est, phthisi mortuo. Tum cum matre apud avos maternos consedit. Egregius discipulus erat et anno 1914 stipendium scholasticum Carnegie sibi meruit ad medicinam in universitate Glasguensi discendam. Primo bello mundano chirurgiam in classe exercuit. Post bellum medicus in regione paupere Cambriae fuit ubi multi operarii et fodinarii erant. Studere non desiit et anno 1924 thesim de aneurysmatibus absolvit. Eodem anno inspector sanitarius fodinarum nominatus est. Postea Londinium movit atque ibi propriae clientelae operam dedit.

Anno 1930 ob duodeni ulcus ad requiem coactus primam mythistoriam Hatter’s Castle scripsit cuius eventa Dumbartonii in Scotia collocavit ubi adulescens fuerat. Ac deinde medicinam omnino deseruit (nisi quod in eius myhistoriis multi medici sunt) et scriptor cum multo successu reliquam vitam degit. Eius mythistoriae in plurimas linguas translatae sunt et versiones cinematographicae aut televisificae ex eis factae sunt. Notissimae sunt The Citadel de medicina in Regno Unito quae ad reformationem sanitarii systematis contulisse dicitur et The Keys of the Kingdom de religiosa tolerantia. Anno 1939 in Civitates Foederatas cum uxore et liberis profectus anno 1945 in Europam rediit et usque ad mortem in Helvetia consedit.

Multa themata in eius operibus cum biographia conexa sunt: multi medici inveniuntur, multi orphani, matrimonia aut amores inter personas religionis diversae, difficultates et miseria classis socialis pauperis describuntur quas in Cambria cognoverat, item Scotiae loca ubi vixerat... Ita elementa autobiographica in mythistoriarum fictis conspersa sunt. Imprimis The green years pueritiam et adulescentiam auctoris evocant.

Opera nonnulla

• Hatter’s Castle (1931)
• The Stars Look Down (1935)
• The Citadel (1937)
• The Valorous Years (1940)
• The Keys of the Kingdom (1941)
• The Green Years (1944)
• Shannon's way (1948)
• The Judas Tree (1961)
• A Song of Sixpence (1964)

Plura legere si cupis

• Tiphaine Averlant-Arnould, Archibald Joseph Cronin : médecin, écrivain et humaniste : introduction à l'univers romanesque de l'auteur de La citadelle, Éditions Complicités, 2024. 978-2-38647-077-6
• Dale Salwak, A.J. Cronin, Bostonii, Twayne Publishers, 1985. 978-0-8057-6884-8

Nexus externi

Vicimedia Communia plura habent quae ad Archibaldum Iosephum Cronin spectant.