Ma (dea)

E Vicipaedia
Salire ad: navigationem, quaerere

Ma fuit una ex magnis matribus quae in Anatolia antiquis temporibus venerabantur. Nomen ipsum matrem significabat. Praecipuum templum Comamis in Cappadocia situm erat. Maxima dea fuit et in Cappadocia et in Ponto. Cultus eius a militibus Sullanis et eorum captivis Romam introductus est, ubi deae Latinae Bellonae adsimulata est. Victoriam enim bello dabat et imperatori Sullae in somnio apparuerat.

Fanatici huius deae, ut Corybantes Cybelae, armati saltabant atque, musica sensus hebetante, membra lacerantes proprio sanguine aram et signum divinum aspergebant. Tum etiam futura confusis vocibus vaticinabantur. Quae orgia Romani diu aspernati sunt : quapropter novus cultus Cappadocis deae sub ritibus similibus et iam notis a Gallis Magnae Matris perfectis latuit. Pompam Cybelae fanatici Ma/Bellonae sequebantur.

Fontes[recensere | fontem recensere]