Felix Malleolus

Felix Hemmerlin. Incisio lignea anno 1497 facta.

Felix Malleolus (natus Hemmerlein vel Hemmerli, Hemmerlin) fuit homo eruditissimus, iurista, theologus, politicus. Filius gentis potentis natus est Turici anno 1388 vel 1389; obiit inter annos 1458 et 1461 Lucernae.

Anno 1418 Erfurti Baccalaureatum Iuris Canonici accepit, anno 1424 Bononiae doctor decretorum creatus est. Fuit canonicus Zofingae, praepositus Soloduri, et potissime canonicus regularis Turici. Possedit bibliothecam abundantem; scripsit plurima opuscula tractatusque, quorum clarissimus Liber de Nobilitate, dialogus inter nobilem et rusticum extollens statum nobilitatis. Interfuit conciliis Constantiensi et Basiliensi. Favit Domui Habsburgensi et lacessivit Suitenses. Scriptis suis inimicitias quasdam suscepit et anno 1454 in monasterio Lucernensi incarceratus est, ubi in scribendo perseveravit.

Opera quaedam

De Nobilitate et Rusticitate dialogus, alias Liber de Nobilitate

Variae oblectationis opuscula et tractatus

Registrum querel<a>e

Nexus externi

• Hemmerlin, Felix: De nobilitate et rusticitate dialogus et alia opuscula. [Argentorati: Johann Prüss], [ca. 1500] . Pagina interretialis Bibliothecae Universitatis Darmstaddii
• Regula Schmid Keeling: Commentatio Hemmerli, Felix in Lexico historico Helvetiae: Theodisce, Francogallice, Italice
• Konstantin M. Langmaier. 2018. "Felix Hemmerli und der Dialog über den Adel und den Bauern (De nobilitate et rusticitate dialogus): Seine Bedeutung für die Erforschung der Mentalität des Adels im 15. Jahrhundert." Zeitschrift für die Geschichte des Oberrheins 166: 21–76. Editio interretialis.