Casula
E Vicipaedia
Casula aut planeta est vestimentum liturgicum quod induit episcopus aut presbyter super tunicam albam ad missam celebrandam in Ecclesia Occidentali (scilicet Ecclesiis Romana Catholica, Lutherana et Anglicana). Similis est paenulae profanae. Duae formae casulae inveniuntur, videlicet forma latina quae est aliquantulum quadrata, cruce aut columpna in dorso acupicta, et forma gothica cuius forma similis est scuti, cui plerumque auriphrygium in forma ypsilonis affigitur.
Color casulae variari solet iuxta anni tempora:
- Color albus aut aureus usurpatur in Tempore Paschali, Nativitate Christi et Festis Virginis Mariae et aliorum sanctorum non martyrum
- Color ruber usurpatur in Dominica Palmarum, die Passionis Domini, Dominica Pentecostae et festis martyrum
- Color violaceus usurpatur in temporibus Adventus et Quadragesimae
- Color viridis usurpatur in Tempore Ordinario
- Color niger usurpatur in Missis Defunctorum
His addi possunt et saccus (aliter dictus "paramentum quadragesimale") et color caeruleus qui locum violacei tenent in quibusdam locis.
