Asiongaber

E Vicipaedia
Salire ad: navigationem, quaerere

Asiongaber (Hebraice עֶצְיֹן גֶּבֶר ), secundum librum Numeri, fuit statio non longe a monte Sinai ad orientem versus ubi Israëlitae ex Aegypto fugientes tentoria posuerunt;[1] quam stationem liber Deuteronomii, eandem rem referens, iuxta Ailath collocat.[2] Auctor libri I Regum asseverat regem Salomonem portum statuisse "in Asiongaber, quae est iuxta Ailath in litore maris Rubri in terra Idumaea" unde naves mercatorias ad Ophir misit;[3] addit regem Iudae Iosaphat "naves Tharsis" confecisse ut in Ophir navigarent aurumque reportarent "et ire non potuerunt, quia confractae sunt in Asiongaber".[4] Secundum Liber II Chronicorum Iosaphat naves suas ad Tharsis, minime ad Ophir, mittere voluit, destructionemque navium prophetavit Eliezer filius Dodiae de Maresa: "Quia habuisti foedus cum Ochozia, percussit Dominus opera tua."[5] Flavius Iosephus oppidum Asiongaber tempore suo nomen Berenice gerere asseverat.[6]

Archaeologus Nelson Glueck collocationem Asiongaber ad ruinas castelli antiqui posuit nomine Tell el-Kheleifeh, constructi (sicut ipse censuit) saeculo X a.C.n. Eruditus recentior Gary Pratico hanc collocationem dubitavit, nulla in eis ruinis ante saeculum VIII a.C.n. facta reperiens, nulla post saeculum V a.C.n.; culturam incolarum Asiongaber minus ad regionem Palaestinam, potius ad Edom adpropinquare voluit.

Notae[recensere | fontem recensere]

  1. Liber Numeri 33.35
  2. Liber Deuteronomii 2.8
  3. Liber I Regum 9.26, cf. Liber II Chronicorum 8.17
  4. Liber I Regum 22.48
  5. Liber II Chronicorum 20.36-37
  6. Iosephus, Antiquitates Iudaicae 8.6.4

Bibliographia[recensere | fontem recensere]

  • "Asiongaber" in The Catholic Encyclopedia: an international work of reference (Novi Eboraci: Appleton, 1907-1914) textus alius
  • Gary D. Pratico, "Nelson Glueck's 1938-1940 Excavations at Tell el-Kheleifeh: a reappraisal" in Bulletin of the American Schools of Oriental Research no. 259 (1985) pp. 1-32
  • Gary D. Pratico et alii, Nelson Glueck's 1938-1940 Excavations at Tell el-Kheleifeh: a reappraisal. Atlanta: Scholar Press, 1993. ISBN 1-55540-883-4 (Vide et recensiones: a Frank Braemer in Syria vol. 74 (1997) pp. 237-238; a William G. Dever in Bulletin of the American Schools of Oriental Research no. 298 (1995) pp. 95-96)