Antigonus Carystius

Vide etiam paginam discretivam: Antigonus

Antigonus Carystius (Graece: Ἀντίγονος ὁ Καρύστιος) fuit scriptor et poëta Graecus tertio saeculo a.C.n. ex urbe Carysto in Euboea oriundus. Aliquanto temporis Athenis et peregrinando peracto, tandem Pergami apud Attalum I regem (241-197 a.C.n.) consedit. Opus de vitis philosophorum nunc deperditum, quo Athenaeus et Diogenes Laërtius usi sunt, conscripsit, epigrammata, quorum Anthologia Palatina servavit unum (IX 406), et carmen epicum, cui titulus fuit Antipater, composuit, et Historias mirabiles collegit. Incertum est an idem sit atque Antigonus ille cui Antoninus Liberalis Alterationes, opus mythographicum, attribuit. Sunt quoque qui eundem esse credunt atque Antigonum sculptorem, pictorem et toreutam quem "volumina condidisse de sua arte" Plinius maior memorat.

Bibliographia

• Textus Antigoni Carystii Historiarum mirabilium in: Otto Keller, Rerum Naturalium Scriptores Graeci Minores, vol. I (Lipsiae 1877) (apud Internet archive).
• Tiziano Dorandi (ed.), Antigone de Caryste, Fragments (Lutetiae 1999).
• Reinhold Köpke, De Antigono Carystio (Berolini 1862).
• William Smith (ed.), Dictionary of Greek and Roman Biography and Mythology (Londinii 1844-1849) 'Antigonus of Carystus'.
• Udalricus de Wilamowitz-Moellendorff, "Antigonos von Karystos," in Philologische Untersuchungen, vol. IV (Berolini 1881) (apud Internet archive).