Amphiaraus
Amphiaraus (Graece Ἀμφιάραος) in mythologia Graeca est vates Argivus, qui expeditioni septem ducum adversus Thebanos interfuit[1]. Cladem signis divinis praenoverat sed Adrastus rex eius monitiones sprevit[2]. Cum inde fugeret, terram inhiasse atque eius currum hausisse dicebant[3]. Filius erat Oeclis Hypermnestraeque, maritus Eriphylae, quae dono corrupta operam dedit, ut maritus ad bellum cum Thebanis proficisci cogeretur, quamquam compererat inde se non rediturum[4]. Filii eis fuerunt Amphilochos et Alcmaeon, qui matrem suam, ut paternae mortis sontem, necavit.
De cultu Amphiarai[recensere | fontem recensere]
In pluribus Graeciae locis honores divini Amphiarao tribuebantur[5], maxime tamen Oropi in Boeotia[6] ad fines Atticae[7]; nam et templum et oraculum Amphiarao ibi erant; qui eum consulebant, eos primo sacrum facere ac deinde in pelle arietis immolati obdormiscere oportebat; noctu enim per somnia deus Amphiaraus eis responsa dabat[8], quae plerumque ad morbos sanandos pertinuisse videntur. Etenim iam tempore septem ducum expeditionis adversus Thebanos Amphiaraus signa divina et somnia Argivis interpretari solebat[9]. Inventor ignispicii quoque habebatur.[10].Cnossius Iophon collectaneum oraculorum Amphiarai collegerat et publicarat, quae tamen apocrypha fuisse existimabat Pausanias, quia Amphiaraus non spiritu divino commotus responsa canebat ut Pythia sed signa a deis missa, in primis somnia, interpretari callebat. Illum librum multos lectores tamen delectasse ipse Pausanias fatebatur. Vestigia certe templi quarto saeculo a.C.n. ineunte aedificati et altaris, cuius ornamenta sculpta accurate a Pausania in libro ad Atticam spectante describebantur ab archaeologis in situ adgnita sunt[11].
Varia[recensere | fontem recensere]
Tiburnus, aut filius[12] aut nepos Amphiarai, urbem Tibur Latii condidisse dicitur.
Praecepta de fabis Amphiarao adscripta in Geoponicis a Graecis citantur.[13]
Notae[recensere | fontem recensere]
- ↑ Aeschylus, Septem contra Thebas 568-625. Euripides, Phoenissae 173-8 et 1109-12.
- ↑ Euripides, Supplices 155-160 et 229-236. cf Septem contra Thebas 378-383 ubi Tydeus vati retinenti repugnat.
- ↑ Euripides, Supplices 500-501.
- ↑ Septem contra Thebas 587-9 et 615-9. Plato, Politia 590a.
- ↑ Argi et Spartae, e.g.
- ↑ Paul Roesch, "L'Amphiaraion d'Oropos" in Temples et sanctuaires, 1984ː 173-184
- ↑ Pausanias libro primo Graeciae descriptionis cap. 34.
- ↑ Hyperides, Pro Euxenippo.
- ↑ Herodotus, Urania 134.
- ↑ Plinius, Naturalis historia 7.203. Euripides, Supplices 155.
- ↑ Paul Frédéric Girard, "Borne sacrée du sanctuaire d'Amphiaraos", Bulletin de Correspondance Hellénique, 1879ː 437-440
- ↑ Plinius, Naturalis historia 16.237.
- ↑ Geoponica 2.35.6-8.
Plura legere si cupis[recensere | fontem recensere]
- Alain Moreau, "Fonction du personnage d'Amphiaraos dans les « Sept contre Thèbes » : le « blason en abyme »", Bulletin de l'Association Guillaume Budé, 1976ː 158-181
- Émilie Piguet, "Du hèrôs au theos. Étude comparée de la double nature et de la diffusion du culte d’Amphiaraos et d'Asclépios", Dialogues d'histoire ancienne, 2017ː 55-90
- Pierre Sineux, Amphiaraos. Guerrier, devin et guérisseur, Les Belles Lettres, 2007 Recensio critica Altera recensio critica Tertia recensio critica
- Paul Vicaire, "Images d'Amphiaraos dans la Grèce archaïque et classique", Bulletin de l'Association Guillaume Budé, 1979ː 2-45